قازاقستان رەسپۋبليكاسى كونستيتۋسياسىنىڭ قولدانىسقا ەنگىزىلگەنىنە بيىل 27 جىل تولىپ وتىر. وسى كەزەڭدە ەلىمىزدىڭ نەگىزگى زاڭى – ورنىقتى، تاۋەلسىز مەملەكەت قۇرۋدىڭ، تۇراقتى دامۋ مەن جاڭا قۇقىقتىق كەڭىستىك قالىپتاستىرۋدىڭ سەرپىندى نورماتيۆتىك تۇعىرىنا اينالدى.
اتا زاڭىمىزدا قازاقستان رەسپۋبليكاسىنىڭ ءاربىر ازاماتىنىڭ جەكە باس بوستاندىعى مەن قۇقىقتارىنا كەپىلدىك بەرىلگەن. ءبىز ەلىمىزدىڭ وسى باستى ءتولقۇجاتىنىڭ ارقاسىندا وزگەلەرمەن تەرەزەسى تەڭ مەملەكەت قۇردىق، حالىقارالىق ساياسات ساحناسىندا لايىقتى ورىن الىپ، الەمگە تانىلدىق، الەۋمەتتىك-ەكونوميكالىق، قۇقىقتىق تۇرعىدا ۇشان-تەڭىز جەتىستىككە جەتىپ، العا نىق قادام باسىپ كەلەمىز.
كونستيتۋسيامىزدى حالقىمىز قۇرمەت تۇتادى. كونستيتۋسيا بويىنشا قازاقستان رەسپۋبليكاسى ءوزىن دەموكراتيالىق، زايىرلى جانە قۇقىقتىق مەملەكەت رەتىندە ورنىقتىرادى. جوعارىدا ايتقانىمداي، اتا زاڭىمىز ازاماتتارىمىزدىڭ ۇلتتىق، ازاماتتىق، الەۋمەتتىك، ساياسي قۇقىقتارىنىڭ قورعالۋى مەن جۇزەگە اسۋىنىڭ كەپىلى بولىپ وتىر. حالىق مەملەكەتتىك بيلىكتىڭ بىردەن-بىر قاينار كوزى بولىپ تابىلادى جانە ونى تىكەلەي رەسپۋبليكالىق رەفەرەندۋم، ەركىن سايلاۋ ارقىلى، سونداي-اق ءوز بيلىگىن مەملەكەتتىك ورگاندارعا بەرۋ ارقىلى جۇزەگە اسىرادى.
بيىل 5 ماۋسىمدا ەلىمىزدە اتا زاڭعا تولىقتىرۋلار مەن تۇزەتۋلەر بويىنشا وتكىزىلگەن جالپىحالىقتىق رەفەرەندۋمدى ەرەكشە اتاپ ءوتۋىمىز كەرەك. ءبارىمىز ماڭىزى ەرەكشە تاريحي وقيعانىڭ كۋاسى بولدىق. قازاقستان حالقى ەرىكتى تۇردە تاريحي تاڭداۋىن جاسادى. كونستيتۋسياعا ەنگىزىلەتىن وزگەرىستەر تۇڭعىش رەت جالپىحالىقتىق رەفەرەندۋم ناتيجەسىندە قابىلدانىپ، جاڭا قازاقستانعا، ادىلەتتى قوعامعا قاراي قادام باستىق.
كونستيتۋسيالىق رەفورمانىڭ ىسكە اسىرىلۋى جانە جاڭا قازاقستان قۇرۋ يدەياسى ەلىمىزدى ىنتىماق، بىرلىك، تاتۋلىققا باستايتىنى ءسوزسىز. ازاماتتاردىڭ قۇقىعىن قورعاۋ ماسەلەسىنە كەلگەندە، ءبىزدىڭ كونستيتۋسيامىز دەموكراتيانىڭ بارلىق تالاپتارىنا ساي كەلەدى. مۇنى الەمنىڭ ءبىرقاتار دامىعان ەلدەرى دە مويىنداپ وتىر.
ەندىگى ماسەلە، كونستيتۋسيالىق رەفورما مەن زاڭنامانىڭ ماڭىزدىلىعى قازاقستاندىقتارعا، ونىڭ ىشىندە جاستارىمىزعا جىل ون ەكى اي ۇزدىكسىز ايتىلۋى قاجەت. بۇل تەك كونستيتۋسيا كۇنى قارساڭىندا ايتىلاتىن ماسەلە ەمەس. اسىرەسە، مەكتەپ قابىرعاسىنداعى، ءبىلىم وشاقتارىنداعى وقۋشىلار مەن ستۋدەنتتەرىمىزدىڭ ساناسىنا ەلىمىزدىڭ نەگىزگى زاڭىنىڭ باعدارلارىن مىقتاپ سىڭىرسەك، مەملەكەتىمىزدىڭ الەۋەتى العا باساتىنى انىق. ءار ازامات ءوزىنىڭ قۇقىقتارىمەن قوسا، مىندەتتەرىن دە جاقسى بىلگەنى قوعام ءۇشىن دە، مەملەكەت ءۇشىن دە، ادام ءۇشىن دە بىردەي ءتيىمدى. سوندىقتان بۇل ناۋقاندىق شارا ەمەس. ءاربىر مەكەمەگە كىرگەن كەزدە سول مەكەمەنىڭ جۇمىس اياسىنا قاتىستى باپتاردى ءىلىپ قويۋ قاجەت دەپ ويلايمىن. مىسالى، ەمحانانىڭ كىرەبەرىسىندە كونستيتۋسياداعى دەنساۋلىق ساقتاۋ سالاسىنا قاتىستى باپ ءىلىنىپ تۇرسىن. ازاماتتارىمىزدىڭ العاشقى تەگىن مەديسينالىق كومەك الۋعا قۇقىعى بار ەكەنى جازىلىپ قويسىن. ءبىلىم وشاعىندا بىلىمگە قاتىستى، اسكەري ورىندا قورعانىسقا قاتىستى باپتار جازىلسىن.
اتا زاڭىمىزدىڭ ومىرىمىزدەگى ورنىن، ءرولىن، ماڭىزىن وسىنداي ناقتى ىستەرمەن ناسيحاتتاۋىمىز كەرەك. سونىمەن قاتار، ەلىمىزدىڭ ءاربىر ازاماتىنىڭ مەملەكەت مۇددەسى جولىنداعى پارىزى مەن بورىشتارىن ءتۇسىندىرۋ جۇمىستارى دا قالىس قالماۋى قاجەت. تۇپتەپ كەلگەندە، اركىم قازاقستان رەسپۋبليكاسىنىڭ كونستيتۋسياسىن جانە زاڭدارىن ساقتاۋعا، مەملەكەتتىڭ مۇددەسىن تۇعىرلاتۋعا، وتانداستارىنىڭ قۇقىقتارىن، بوستاندىقتارىن، ابىرويى مەن قادىر-قاسيەتىن قۇرمەتتەۋگە مىندەتتى. جالپى، جاڭارتىلعان كونستيتۋسيا بىزگە مەملەكەتىمىزدىڭ تاۋەلسىزدىگىن اشىق دەموكراتيالىق قاعيداتتار نەگىزىندە تۇعىرلاتۋعا مۇمكىندىك بەرمەك. بۇل، اسىرەسە، بۇگىنگى ستۋدەنت-جاستارىمىز ءۇشىن ماڭىزدى بەلەس بولماق. ال مەملەكەتشىل، ءبىلىمدى، ىسكەر دە بىلىكتى جاستارىمىز بۇكىل قوعامنىڭ دامۋىنا تىڭ سەرپىن بەرەرى ءسوزسىز.