قىرعىزستاننىڭ بۇرىنعى مەملەكەت باسشىسى اسقار اقايەۆ ەل پارلامەنتىنە ەكس-پرەزيدەنت مارتەبەسىن قايتارۋدى سۇراپ حات جولدادى، دەپ حابارلايدى aqshamnews.kz.
جوگوركۋ كەنەشتىڭ باسپا ءسوز قىزمەتىنىڭ حابارلاۋىنشا، اتالمىش حات 5 قىركۇيەك كۇنى قىرعىز رەسپۋبليكاسى جوگوركۋ كەنەشىنىڭ كونستيتۋسيالىق زاڭناما، مەملەكەتتىك قۇرىلىم، سوت-قۇقىقتىق ماسەلەلەر جانە رەگلامەنت كوميتەتىنە كەلىپ تۇسكەن.
اتالعان كوميتەت ءتوراعاسى، دەپۋتات چولپون سۇلتانبەكوۆا بۇل ماسەلە كۇن تارتىبىندە بىردەن قارالمايتىنىن اتاپ ءوتتى.
— بۇل ماسەلەنى قاراۋ پروسەدۋراسى وتە ۇزاق پروسەسس. ماسەلە ءبىر كۇندە شەشىلمەيدى. حات پارلامەنتكە كەشە ءتۇستى، مەن ونى بۇگىن تاڭەرتەڭ عانا الدىم. سۇراق ساياسي. جوگوركۋ كەنەش — القالى ورگان. كۇن تارتىبىنە ەنگىزۋ نەمەسە ەنگىزبەۋ، سونداي-اق قاراۋ ءتارتىبىنىڭ باسقا دا نيۋانستارى تۋرالى شەشىم بىرلەسىپ قابىلدانادى، — دەدى دەپۋتات.
ەستەرىڭىزگە سالا كەتەيىك، اسقار اقايەۆ 1990 جىلدىڭ 27 قازانى مەن 2005 جىلدىڭ 11 ءساۋىرى ارالىعىندا قىرعىزستان پرەزيدەنتى بولدى.
2005 جىلعى «قىزعالداق توڭكەرىسىنەن» كەيىن ول رەسەي فەدەراسياسىنا كەتتى. ءقازىر سوندا تۇرادى جانە عىلىمي قىزمەتپەن اينالىسادى.
قىرعىزستان باس پروكۋراتۋراسى اسقار اقايەۆقا قاتىستى قىلمىستىق ءىستى توقتاتقان بولاتىن.
وعان «بيلىكتى نەمەسە قىزمەتتىك بابىن اسىرا پايدالانۋعا قاتىسى بار»، «كامەكو» كومپانياسىمەن كەلىسىم جاساۋ ەپيزودتارىنا نەمقۇرايلىلىق تانىتتى» دەگەن ايىپ تاعىلعان ەدى.