الماتىداعى ازاماتتىق اۆياسيا اكادەمياسىندا وسى كۇنى 300-دەن استام قىز بالا وقيدى
ولاردىڭ 30-ى اۋە كولىگىن باسقاراتىن ۇشقىش بولعىسى كەلەدى، دەپ حابارلايدى Almaty-akshamy.kz Almaty.tv-عا سىلتەمە جاساپ.
ۇشقىش ماماندىعىندا وقيتىن ءمولدىر باسىندا حيميك بولۋدى ارمانداعان. ءارى اتا-اناسى دا اۆياسيا سالاسىن تاڭداۋىنا قارسى بولىپتى. الايدا ول دەگەنىنەن قايتپاي، تۇبىندە ءوزى قالاعان وقۋ ورنىنا تۇسكەن ەكەن. ونىڭ ەندىگى ارمانى – شەتەلدە تاجىريبە جيناپ، ءبىلىمىن ۇشتاۋ.
«مەكتەپتە ۇشقىشتارمەن كونفەرەنسيا بولدى. سول كەزدە كوماندير پيلوتتىڭ اڭگىمەسى، ءوزىن-وزى ۇستاۋى، ۇشاقتىڭ ۇشۋى تۋرالى ءتۇسىندىرۋى، ءبارى ماعان ۇنادى. سول ساتتە ءبىر كۇندە ۇشقىش بولامىن دەپ شەشتىم»، - دەيدى ازاماتتىق اۆياسيا اكادەمياسىنىڭ ستۋدەنتى ءمولدىر تۇرعان.
ارمان قۋىپ، سوناۋ سولتۇستىكتەن كەلگەن ءدىلناز بالا كەزىنەن اۋەجايعا قاتىستى كينوتۋىندىلاردى كوپ كورگەندىكتەن، اۆياسيا سالاسىن تاڭداپتى. ارمانى الداماعان. ءقازىر ول اۋەجايلاردىڭ جەردەگى راديوەلەكتروندىق جابدىقتارىنا قىزمەت كورسەتۋ مامانداعىندا ءبىلىم الىپ جاتىر.
«مەن 9-سىنىپتى بىتىرگەننەن كەيىن اۋەجايعا قاتىستى فيلم كورگەن بولاتىنمىن. ياعني جۇمىس ىستەپ جۇرگەن ادامداردىڭ اتموسفەراسى ماعان ۇناعاندىقتان، 10-سىنىپتا فيزيكا ءپانىن تاڭدادىم. الداعى ۋاقىتتا اۋەجايدا جۇمىس ىستەپ، ونى دامىتقىم كەلەدى»، - دەيدى ازاماتتىق اۆياسيا اكادەمياسىنىڭ تاعى ءبىر ستۋدەنتى ءدىلناز نۇرمۇحامبەت.
بۇگىندە ازاماتتىق اۆياسيا اكادەمياسىن بىتىرگەن ارۋلاردىڭ 15ء-ى وتاندىق ۇشاقتاردى باسقارىپ ءجۇر.
«قىزدارىمىز ءقازىر تىرشىلىكتىڭ كەز كەلگەن تۇسىندا ءوز ورنىن تاۋىپ جاتىر. اسپاندى باعىندىرىپ جۇرگەن اپكە-قارىنداستارىمىز از ەمەس»، - دەدى ازاماتتىق اۆياسيا اكادەمياسى اكادەميالىق جۇمىس دەپارتامەنتىنىڭ ديرەكتورى اركەن شانلاياكوۆ.
بولاشاق ۇشقىشتار 1 كۋرستا جاي عانا تەوريالىق ءبىلىم السا، ەكىنشى جانە ءۇشىنشى جىلدان باستاپ اۋە سيمولياتورى دەپ اتالاتىن ۇشاق ماكەتىندە تاجىريبەدەن وتەدى.
اۆياسيا سالاسىن يگەرىپ جاتقان قىزداردىڭ ەندىگى ارمانى وقۋلارىن ۇزدىك اياقتاپ، وتاندىق اۋە كومانيالارىنا جۇمىسقا تۇرۋ.