قازاقستاندا قارۋلى كۇشتەرى قىزمەتتىك مالىمەتتەردى جىبەرۋ ءۇشىن وتاندىق Aitu مەسسەندجەرىنە كەزەڭ-كەزەڭمەن كوشۋدى باستايدى، دەپ حابارلايدى قورعانىس مينيسترلىگى.
بۇل شەشىم شەتەلدىك پلاتفورمالاردى پايدالانعان كەزدەگى ءقاۋىپتى ازايتۋعا باعىتتالعان.
"وتاندىق مەسسەندجەرگە كوشۋ – مەملەكەتتىك قۇرىلىمداردا، ونىڭ ىشىندە قورعانىس سالاسىندا دا قىزمەتتىك اقپاراتتى قورعاۋ دەڭگەيىن ارتتىرۋ بويىنشا نەگىزگى قادامداردىڭ ءبىرى. بۇعان دەيىن دەرەكتەردى جىبەرۋ ءۇشىن كوبىنەسە شەتەلدىك مەسسەندجەرلەر قولدانىلىپ كەلگەن"، - دەپ جازىلعان حابارلامادا.
مينيسترلىك مالىمەتىنشە، بۇل ءوز كەزەگىندە قاۋىپسىزدىككە بەلگىلى ءبىر قاتەر ءتوندىرۋى مۇمكىن. ال Aitu مەسسەندجەرى قازاقستان قۇزىرەتىندە جانە دەرەكتەردى ساقتاۋ مەن وڭدەۋ تالاپتارىنا تولىق ساي كەلەدى. بۇل اقپارات اعىنىن تولىق باقىلاۋعا مۇمكىندىك بەرەدى.
Aitu مەسسەندجەرىنە كوشۋ كەزەڭ-كەزەڭمەن جۇزەگە اسىرىلادى جانە پروسەسس 2025 جىلدىڭ سوڭىنا دەيىن اياقتالادى.
جاڭا مەسسەندجەر كەڭ اۋقىمدى مىندەتتەردى شەشۋ ءۇشىن قولدانىلاتىن بولادى. ونىڭ ىشىندە جەدەل اقپارات الماسۋدان باستاپ، جينالىستار وتكىزۋ مەن ءىس-قيمىلداردى ۇيلەستىرۋ شارالارى دا بار. بۇل قاۋىپسىزدىك دەڭگەيىن ارتتىرىپ قانا قويماي، ىشكى كوممۋنيكاسيانى دا وڭتايلاندىرۋعا مۇمكىندىك بەرەدى.