اسكەري ۇشقىشتاردىڭ جالاقىسى كوتەرىلەدى

2023 جىلى اسكەري ۇشقىشتاردىڭ جالاقىسى ورتاشا العاندا 60 پايىزعا وسەدى.

بۇل جونىندە مەملەكەت باسشىسى قاسىم-جومارت توقايەۆ 5 مامىر كۇنى وتكەن بۇكىلارميالىق كەڭەستە ءمالىم ەتتى، دەپ حابارلايدى Almaty-akshamy.kz Astanatv.kz-كە سىلتەمە جاساپ. 

سونداي-اق پرەزيدەنت وسى سالاداعى وقىتۋشىلار مەن دارىگەرلەردىڭ جالاقىسى دا كوبەيەتىنىن ايتتى.

«كەلەسى جىلى اسكەري اتاق ءۇشىن تولەنەتىن ايلىق اقى 30 پايىزعا ارتادى. ولار تۇرمىسىنا الاڭداماي، ەل قورعاۋعا ساقاداي ساي بولۋى كەرەك»، - دەگەن مەملەكەت باسشىسى اسكەري قىزمەتشىلەردى زەينەتاقىمەن قامتۋ ماسەلەسى دە قايتا قارالىپ جاتقانىن اتاپ ءوتتى.

«سەرجانتتاردى، وفيسەرلەردى الەۋمەتتىك قولداۋ جۇمىسى جالعاسادى»، – دەدى پرەزيدەنت.

قورعانىس جانە قاۋىپسىزدىك سالاسى ەلىمىزدى تۇراقتى دامىتۋ ىسىندە ايرىقشا ماڭىزدى ءرول اتقارادى.

«ايبىندى ارميا – قاسيەتتى جەرىمىزدى جانە ەلىمىزدى قورعايتىن سەنىمدى قالقان. حالقىمىز الاڭسىز ءومىر ءسۇرۋى ءۇشىن اسكەري قىزمەتشىلەر ءوز مىندەتىن مۇلتىكسىز اتقارۋى كەرەك»، - دەدى قاسىم-جومارت توقايەۆ. 

ءسوز سوڭىندا پرەزيدەنت وتان كۇزەتىندەگى ءاربىر جاۋىنگەر انتىنا ادال بولاتىنىنا سەنىم ءبىلدىردى.