ولار ارنايى وقۋ-جاتتىعۋعا قاتىسىپ جاتىر.
قازاقستانداعى اسكەري ۇشقىشتار قاتارى كاسىبي شەبەرلىكتەرىن ارتتىرىپ جاتىر. ولار ارنايى ۇيىمداستىرىلعان وقۋ-جاتتىعۋعا قاتىسىپ جاتىر، دەپ حابارلادى Almaty-akshamy.kz.
«اقتوبەدەگى ەكى مارتە كەڭەس وداعىنىڭ باتىرى تالعات بيگەلدينوۆ اتىنداعى اۋە قورعانىسى كۇشتەرى اسكەري ينستيتۋتىنىڭ بازاسىندا ارميا اۆياسياسى ۇشقىشتارىنىڭ جيىنى ءوتىپ جاتىر»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
جيىننىڭ پراكتيكالىق بولىگى «حلەبوداروۆكا» دالالىق اۋە ايلاعىندا ۇيىمداستىرىلدى. اسكەري ينستيتۋتتىڭ اۆياسيا گەنەرال-مايورى داۋرەن قوسانوۆ ۇشۋدى باسقاردى.
«جوندەۋ-قالپىنا كەلتىرۋ جۇمىستارىنان سوڭ اۋە ايلاق جارىق تەحنيكالىق جابدىقتار كەشەنىمەن جانە اۋە كەمەلەرىن قوندىرۋدىڭ راديولوكاسيالىق جۇيەسىمەن جاراقتاندىرىلعان. بۇل تۇنگى ۋاقىتتا، كۇردەلى مەتەورولوگيالىق جاعدايلاردا، ونىڭ ىشىندە قار جامىلعان لاندشافتا جانە اۋا تەمپەراتۋراسى تومەن كەزدە ۇشۋعا دايىندىق شارالارىن جۇرگىزۋگە مۇمكىندىك بەرەدى»، – دەپ اتاپ ءوتتى ينستيتۋت باستىعى.
ۇشۋ شەبەرلىگى مەن داعدىنى ارتتىرۋعا باعىتتالعان وقۋ-جاتتىعۋ ۇشۋلارىن ارميا اۆياسياسىنىڭ ەكيپاجدارى مي-8مت كولىكتىك-اسكەري جانە مي-35م جاۋىنگەرلىك تىكۇشاقتارىندا ورىندايدى.
جيىن ءبىر اي بويى وتەدى. وسى كەزەڭدە 30-دان استام ۇشقىش دايىندالادى. سىناقتار تاپسىرعان ۇشۋ قۇرامىنا ءتيىستى «3-سىنىپتى ۇشقىش»، «2-سىنىپتى ۇشقىش»، «1-سىنىپتى ۇشقىش» جانە «ۇشقىش-مەرگەن» سىنىپتىق بىلىكتىلىكتەرى بەرىلەدى.