اسكەري قىزمەتشى قازاقستاننىڭ رەكوردتار كىتابىنا ەندى

ول 350 شاقىرىمدى 47 ساعات 23 مينۋتتا جۇگىرىپ ءوتتى.

قۇرلىق اسكەرلەرى اسكەري ينستيتۋتىنىڭ «ءالي» وقۋ-جاتتىعۋ ورتالىعى قامتاماسىز ەتۋ روتاسى جاۋىنگەرلىك كولىگىنىڭ كومانديرى، 3-سىنىپتى سەرجانت راۋان ابىلحانوۆتىڭ ەسىمى قازاقستاننىڭ رەكوردتار كىتابىنا ەنگىزىلدى، دەپ حابارلايدى Almaty-akshamy.kz

قورعانىس مينيسترلىگىنىڭ مالىمەتىنشە، اسكەري قىزمەتشى ۋلترامارافوندى ءساتتى اياقتادى. ول «ءالي» وقۋ-جاتتىعۋ ورتالىعىنان الماتى وبلىسىنىڭ شەلەك اۋدانى باعىتىندا 350 شاقىرىمدى 47 ساعات 23 مينۋتتا جۇگىرىپ ءوتتى.

مارافونشىنى مارە سىزىعىندا ينستيتۋت باسشىلىعى، ارىپتەستەرى، تۋىستارى مەن دوستارى قارسى الدى.

«تاباندىلىق پەن جەڭىسكە دەگەن ەرىك-جىگەردىڭ ارقاسىندا 3-سىنىپتى سەرجانت راۋان ءابىلحانوۆ 47 ساعات 23 مينۋتتا مەجەلى قاشىقتىقتى جۇگىرىپ ءوتىپ، رەكورد ورناتتى. راۋان - ءوز ماقساتىنا جەتۋدە بار-كۇش جىگەرىن اياماعان ناعىز جاۋىنگەر»، – دەدى اسكەري ينستيتۋت باستىعىنىڭ ءبىرىنشى ورىنباسارى، پودپولكوۆنيك جانىبەك سارعازين.

راۋان ءابىلحانوۆتىڭ جەڭىل اتلەتيكامەن اينالىسقانىنا ون جىلدان اسىپتى. رەكوردسمەن - الماتىدا جانە ەلىمىزدىڭ قارۋلى كۇشتەرىندە وتكەن بىرنەشە مارافونداردىڭ جەڭىمپازى.

«بۇل - مەنىڭ عانا ەمەس، بارلىق ارىپتەسىمنىڭ، تۋىستارىمنىڭ، دوستارىمنىڭ جەڭىسى. ولاردىڭ سەنىمى مەن ءۇمىتىن اقتاۋ ءۇشىن بار كۇش-جىگەرىمدى سالدىم»، – دەيدى 3-سىنىپتى سەرجانت راۋان ءابىلحانوۆ.

مارافونشىنىڭ قۇرمەتىنە وتكەن سالتاناتتى جيىندا قازاقستان رەكوردتار كىتابىنىڭ وكىلدەرى وعان ءتيىستى سەرتيفيكات تابىس ەتتى. ال دوستارى Kia Rio اۆتوكولىگىن سىيعا تارتتى.