ءماجىلىستىڭ جالپى وتىرىسىندا «اسكەري پوليسيا ورگاندارى تۋرالى» زاڭ جوباسى ءبىرىنشى وقىلىمدا قابىلداندى.
قازاقستاننىڭ قاۋىپسىزدىگىنە اسەر ەتەتىن ىشكى جانە سىرتقى فاكتورلارعا بايلانىستى اسكەري پوليسيانىڭ وكىلەتتىكتەرىن كەڭەيتۋ جوسپارلانۋدا، دەپ حابارلايدى Almaty-akshamy.kz.
جالپى وتىرىستا زاڭ جوباسىن قورعانىس ءمينيسترىنىڭ ورىنباسارى سۇلتان كامالەتدينوۆ تانىستىردى.
«ءبىرىڭعاي قولدانۋ جانە ءتۇسىندىرۋ ءۇشىن «قىزمەتكەر» تەرمينى «اسكەري قىزمەتشى» تەرمينىمەن اۋىستىرىلدى. اسكەري پوليسيانىڭ ساياسي پارتيالاردىڭ قىزمەتىنە تاۋەلسىزدىك ءپرينسيپى قوسىلدى. قارۋ مەن ارنايى فيزيكالىق اسەر ەتۋ قۇرالدارىن قولدانۋ رەتتەلدى»، - دەدى سۇلتان كامالەتدينوۆ.
زاڭ جوباسى قازاقستان رەسپۋبليكاسى قارۋلى كۇشتەرىنىڭ، ۇلتتىق قاۋىپسىزدىك كوميتەتىنىڭ جانە ۇلتتىق ۇلاننىڭ اسكەري پوليسيا ورگاندارىنىڭ مارتەبەسىن، قۇزىرەتىن، قىزمەتىن ۇيىمداستىرۋدى جانە ءتارتىبىن ايقىنداۋعا باعىتتالعان. زاڭ جوباسىندا اسكەري پوليسياعا اسكەري قىزمەت قاۋىپسىزدىگىن قامتاماسىز ەتۋدى ۇيىمداستىرۋدى ۆەدومستۆولىق باقىلاۋ فۋنكسياسىن بەرۋ دە قاراستىرىلعان. اسكەري پوليسيا قىزمەتكەرلەرىن الەۋمەتتىك-قۇقىقتىق قورعاۋ جانە كادر ماسەلەسى بويىنشا تولىقتىرۋلار ەنگىزىلۋدە، اسكەري پوليسيا ورگاندارىنىڭ مەملەكەتتىك ورگاندارمەن جانە ۇيىمدارمەن، لاۋازىمدى تۇلعالارمەن ءوزارا ءىس-قيمىلى جانە ىنتىماقتاستىعى تاراۋى كەڭەيتىلدى.
قازاقستان رەسپۋبليكاسىنىڭ كەيبىر زاڭنامالىق اكتىلەرىنە اسكەري پوليسيا ورگاندارىنىڭ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ىلەسپە زاڭ جوباسىمەن قازاقستان رەسپۋبليكاسىنىڭ قىلمىستىق كودەكسىنە جانە ءبىرقاتار زاڭدارعا وزگەرىستەر مەن تولىقتىرۋلار ەنگىزىلەدى. «قورعانىس جانە قارۋلى كۇشتەر تۋرالى» زاڭعا قازاقستان رەسپۋبليكاسىنىڭ پرەزيدەنتى مەن قازاقستان رەسپۋبليكاسى قورعانىس مينيسترلىگىنە اسكەري جوسپارلاۋ جۇيەسىن بەكىتۋ جانە دامىتۋ وكىلەتتىكتەرىن بەرۋ ماقساتىندا وزگەرىستەر ەنگىزىلۋدە.
زاڭ جوباسىن ءماجىلىس ءبىرىنشى وقىلىمدا ماقۇلدادى.