مەرەكە قارساڭىندا «نۇرلى جول» تەمىرجول ۆوكزالى مەن «قازمەديا ورتالىعى» تەلەراديوكەشەنىندە ق ر قارۋلى كۇشتەرى ۇلتتىق اسكەري-پاتريوتتىق ورتالىعى ورتالىق اسكەري وركەسترىنىڭ كونسەرتتەرى ءوتتى.
حالىقارالىق ايەلدەر كۇنىنە ارنالعان ءىس-شارا جولاۋشىلاردى بەي-جاي قالدىرمادى. اسكەري قىزمەتشىلەر ايەلدەرگە شوكولاد پەن كوكتەمنىڭ سيمۆولى قىزعالداق سىيلادى، دەپ حابارلايدى aqshamnews.kz.
– ەلوردانىڭ حالىق كوپ جينالاتىن الاڭدارىندا ونەر كورسەتۋ جاقسى داستۇرگە اينالدى. بۇگىن ءبىز 68665 اسكەري ءبولىمىنىڭ قۇرمەت قاراۋىل روتاسىمەن بىرلەسىپ، اجەلەرىمىزدى انالارىمىز بەن اپكەلەرىمىزدى مەرەكەمەن قۇتتىقتادىق. ءداستۇر بويىنشا ءبىز اسكەري-پاتريوتتىق اندەردى، مارشتار مەن كوپشىلىككە تانىمال اۋەندەردى ورىندادىق. بارلىق ايەل-انالارعا باقىت تىلەيمىن، – دەدى ورتالىق اسكەري وركەستردىڭ ديريجەرى اعا سەرجانت ابزال يمانعالييەۆ.
تىڭداۋشىلار ۇلتتىق اسكەري-پاتريوتتىق ورتالىق شىعارماشىلىق ۇجىمىنىڭ ونەرىن جىلى قابىلدادى.
– جۇمىستا ءجۇرىپ، مەرەكەنى ۇمىتىپ كەتىپ جاتامىز. بۇگىن اسكەري مۋزىكانتتاردىڭ ارقاسىندا ءبىز مەرەكەلىك كوڭىل-كۇيدى سەزىنە الدىق. اسكەري قىزمەتشىلەردىڭ مۋزىكالىق تارتۋى ءبىزدى شابىتتاندىرىپ، جارقىن ەموسيا سىيلادى. بارشاڭىزعا بەيبىتشىلىك، جاقسىلىق پەن اماندىق تىلەيمىن، – دەدى «حابار» اگەنتتىگىنىڭ اباي وبلىسىنداعى مەنشىكتى ءتىلشىسى بوتاگوز داندىبايەۆا.
قۇرمەت قاراۋىل روتاسىنىڭ اسكەري قىزمەتشىلەرى ساپتىق دەفيلە ورىنداپ، جولاۋشىلاردى قيمىل ۇيلەسىمدىلىگىمەن تاڭ قالدىردى.
– نەمەرەم ەكەۋمىز جەزقازعانعا بارا جاتىرمىز. مىنە، وسىنداي كەرەمەت كونسەرتكە كۋا بولدىق. اسكەري قىزمەتشىلەرگە مەرەكەلىك كوڭىل-كۇي سىيلاعانى ءۇشىن راحمەت ايتامىن، – دەدى ساۋلە ءجاندىلدينا.
كورەرمەندەر مۋزىكانتتار مەن سوليستەرگە ۇلكەن قوشەمەت كورسەتتى. ال مۋزىكانتتار ءۇشىن جولاۋشىلاردىڭ ريزاشىلىعى ەڭ جاقسى ماراپات بولدى.