8 ناۋرىز – حالىقارالىق ايەلدەر كۇنىنە وراي الماتى قالاسى بويىنشا قاجد-عا قاراستى №72 مەكەمەسىندە شارۋاشىلىق جاساعىنداعى سوتتالعان ايەلدەرگە ارنالعان ەرەكشە مەرەكە ۇيىمداستىرىلدى، دەپ حابارلايدى aqshamnews.kz.
مەرەكە كۇنى سوتتالعان ايەلدەر ءوز ونەرلەرىن ورتاعا سالىپ، مەكەمەنىڭ تاربيە بولىمىندەگى قىز-كەلىنشەكتەردى كوكتەمنىڭ شۋاقتى مەرەكەسىمەن قۇتتىقتادى. سالتاناتتى جيىندا مەكەمە جاساق باستىعى م. يبرايمولدايەۆ قۇتتىقتاۋ ءسوز سويلەپ، مەرەكەنىڭ ماڭىزدىلىعىن اتاپ ءوتتى.
- قىمباتتى قىز-كەلىنشەكتەر! ايەل – ءار وتباسىنا باقىت سىيلايتىن جان. سىزدەر بار جەردە بەرەكە مەن بىرلىك بار. ال بىرلىك بار جەردە تىرلىك بولاتىنى ءسوزسىز. "اداسقاننىڭ ايىبى جوق، قايتىپ ءۇيىرىن تاپقان سوڭ" دەگەن ءسوز بەكەر ايتىلماعان. سوندىقتان بۇگىن جازالى بولىپ جۇرگەن انالار مەن ارۋلاردىڭ تەزىرەك ەركىندىككە شىعىپ، قوعامعا پايدالى ىسپەن اينالىسۋلارىنا تىلەكتەسپىن. قۇرمەتتى انالار مەن ارۋلار، شاڭىراقتارىڭىزعا شاتتىق، ومىرلەرىڭىزگە باقىت تىلەيمىن، – دەدى م. يبرايمولدايەۆ.
سونىمەن قاتار مەرەكە بارىسىندا مەكەمەدەگى مادەني-تاربيەلىك ءىس-شارالارعا بەلسەنە قاتىسقان قىز-كەلىنشەكتەر مەكەمە باستىعىنىڭ ماراپاتىنا يە بولدى. مەرەكە سوڭىندا سوتتالعانداردىڭ كۇشىمەن دايىندالعان كونسەرتتىك باعدارلاما ۇسىنىلىپ، قاتىسۋشىلارعا ەرەكشە كوڭىل-كۇي سىيلادى.