اسكەري ينفراقۇرىلىم وبەكتىلەرى پايدالانۋعا بەرىلدى
لۋگوۆوي گارنيزونىندا 400-دەن استام اسكەري قىزمەتشى سياتىن ءۇش كازارماداعى جوندەۋ جۇمىستارى اياقتالدى
قورعانىس ءمينيسترىنىڭ تىل جانە اسكەري ينفراقۇرىلىم جونىندەگى ورىنباسارى، گەنەرال-لەيتەنانت مۇحامەدجان تالاسوۆ جامبىل وبلىسىنداعى اسكەري نىسانداردا جۇرگىزىلگەن جۇمىستاردىڭ ساپاسىن تەكسەردى، دەپ حابارلايدى Almaty-akshamy.kz.
ساپار بارىسىندا ۆەدومستۆو باسشىسىنىڭ ورىنباسارى جوندەۋ جۇرگىزىلگەن عيماراتتار مەن ءۇي-جايلاردى پايدالانۋعا قابىلداۋ جونىندەگى جەرگىلىكتى كوميسسيالاردىڭ قورىتىندىلارىمەن تانىستى. بۇگىندە لۋگوۆوي گارنيزونىندا 400-دەن استام اسكەري قىزمەتشى سياتىن ءۇش كازارماداعى جوندەۋ جۇمىس اياقتالدى. سونداي-اق، قازاندىق، مونشا-كىر جۋۋ كەشەنى مەن ءۇش تۇرعىن ءۇي تولىقتاي جوندەۋدەن وتكىزىلدى.
جۋالى اۋدانىندا اۋداندىق پايدالانۋ ءبولىمى جوندەۋ-قالپىنا كەلتىرۋ ۆزۆودىنىڭ كۇشىمەن اسكەري تەحنيكا مەن ماتەريالدىق قۇرالداردى ساقتاۋعا ارنالعان ەكى انگار تۇرعىزىلدى. بۇدان وزگە 100 ورىندىق اسحانانىڭ اعىمداعى جوندەۋى اياقتالدى.
- اسكەري ينفراقۇرىلىمدى جەتىلدىرۋ - قورعانىس ۆەدومستۆوسىنىڭ ماڭىزدى مىندەتتەرىنىڭ ءبىرى. كەڭ جانە ىڭعايلى كازارمالار مەن اسحانالار، اسكەري قالاشىقتاردىڭ ۇزدىكسىز جۇمىس ىستەيتىن تۇرعىن ۇي-كوممۋنالدىق شارۋاشىلىعى اسكەري قىزمەتشىلەردىڭ جايلى قىزمەتى مەن ءومىرىنىڭ نەگىزى عانا ەمەس، سونىمەن قاتار جەكە قۇرامنىڭ جاۋىنگەرلىك دايىندىعىنىڭ ماڭىزدى فاكتورى بولىپ تابىلادى، – دەپ اتاپ ءوتتى تەكسەرۋ بارىسىندا گەنەرال-لەيتەنانت مۇحامەدجان تالاسوۆ.
تاياۋ كۇندەرى ءبىرقاتار گارنيزونداردا جوندەۋ جۇمىستارى اياقتالاتىن نىساندار پايدالانۋعا بەرىلمەك