2020 جىلدان باستاپ قارۋلى كۇشتەردىڭ بولىمشەلەرى مەن مەكەمەلەرىنە 80-نەن استام تەحنيكا جەتكىزىلدى
قازاقستاننىڭ تاۋەلسىزدىك كۇنى قارساڭىندا اسكەري ينفراقۇرىلىم باس باسقارماسىنىڭ مەكەمەلەرىنە قورعانىس ءمينيسترىنىڭ ورىنباسارى، گەنەرال-لەيتەنانت مۇحامەدجان تالاسوۆ سالتاناتتى تۇردە اۆتوموبيل جانە ارنايى تەحنيكانىڭ كىلتتەرىن تابىس ەتتى، دەپ حابارلايدى Almaty-akshamy.kz.
گارنيزوندارعا 30-دان استام ارنايى جول-قۇرىلىس جانە كوممۋنالدىق-پايدالانۋ تەحنيكاسى تۇسەدى.
ءىس-شارا قورعانىس مينيسترلىگىنىڭ ەلوردالىق جول-پايدالانۋ ۋچاسكەسىنىڭ بازاسىندا ءوتتى. قورعانىس ءمينيسترىنىڭ تىل جانە اسكەري ينفراقۇرىلىم جونىندەگى ورىنباسارى جەكە قۇرامعا اسكەري وبەكتىلەردىڭ جۇمىس ىستەۋىن قامتاماسىز ەتۋ جونىندەگى ءتيىمدى جۇمىسى ءۇشىن العىس ايتتى.
– مەملەكەت ەلدىڭ قاۋىپسىزدىگىن قامتاماسىز ەتۋ ءۇشىن ادال ەڭبەك ەتۋىمىزگە بارلىق جاعداي جاساپ جاتىر. بۇگىن جاڭا تەحنيكانى الدىق. ونىڭ كومەگىمەن ءبىزدىڭ ماماندار قارۋلى كۇشتەردىڭ جاۋىنگەرلىك دايىندىعىن قولداپ، اسا ماڭىزدى ءرول اتقاراتىن اسكەري ينفراقۇرىلىمنىڭ ساپاسىن ارتتىرۋعا جاعداي جاسايتىن بولادى، – دەدى گەنەرال-لەيتەنانت مۇحامەدجان تالاسوۆ.
ايتا كەتۋ كەرەك، مەملەكەتتىك قورعانىس تاپسىرىسى اياسىندا ارنايى ماشينالار پاركىن جاڭارتۋ بويىنشا جوسپارلى جۇمىستار جۇرگىزىلىپ جاتىر. 2020 جىلدان باستاپ قارۋلى كۇشتەردىڭ بولىمشەلەرى مەن مەكەمەلەرىنە 80-نەن استام تەحنيكا جەتكىزىلدى.