اسكەري بولىمدەگى جارىلىس: ەۆاكۋاسيالانعان تۇرعىندار بۇگىن ۇيىنە قايتارىلادى

جامبىل وبلىسىنداعى اسكەري بولىمدەگى جارىلىستان كەيىن ەۆاكۋاسيالانعان اۋىل تۇرعىندارى بۇگىن ۇيىنە قايتارىلادى. بۇل تۋرالى جامبىل وبلىسىنىڭ اكىمى بەردىبەك ساپاربايەۆ مالىمدەدى، دەپ حابارلايدى almaty-akshamy.kz

«جارىلىس بولعان جەرگە جاقىن ورنالاسقان 3 ەلدى مەكەن بار. ونىڭ ەڭ جاقىنى قاينار اۋىلى 1 شاقىرىم جەردە. ال قالعان ەكەۋىنىڭ قاشىقتىعى 5 شاقىرىمدى قۇرايدى. وسى ءۇش ەلدى مەكەندە 718 ادام تۇرادى. كەشە ول كىسىلەردىڭ بارلىعى باسقا جەرلەرگە، ياعني ءبىز دايىنداعان 10 مەكتەپكە جانە 5 كوللەدجدىڭ جاتاقحانالارىنا ورنالاستىرىلدى. سوڭىندا ولاردان 227 ادام قالدى. ال قالعاندارى اعايىن-تۋىسقاندارىنا كەتتى»، - دەدى وبلىس باسشىسى جامبىل وڭىرلىك كوممۋنيكاسيالار قىزمەتىندەگى باسپا ءسوز ءماسليحاتى بارىسىندا.

سونىمەن قاتار ول بۇگىن تاڭەرتەڭ ەۆاكۋاسيالانعان ادامدارعا بارىپ، جاعدايلارىن بىلگەندىگىن اتاپ ءوتتى. «ولار ءتيىستى كومەكپەن، ياعني تاماق، سۋسىنمەن قامتاماسىز ەتىلگەن. ەندى جالپى جاعدايعا قاراپ، بارلىعى دۇرىس دەپ شەشىلسە، وندا بۇگىن ولاردىڭ بارلىعىن ۇيلەرىنە قايتارامىز»، - دەدى بەردىبەك ساپاربايەۆ.