سوڭعى دەرەكتەر بويىنشا، جامبىل وبلىسىنداعى جارىلىس سالدارىنان اۋرحاناعا 28 ادام تۇسكەن. ونىڭ التاۋىنىڭ جاعدايى اۋىر، دەپ حابارلايدى almaty-akshamy.kz جامبىل وبلىسى اكىمىنىڭ باسپا ءسوز قىزمەتىنە سىلتەمە جاساپ.
«27 تامىز كۇنى ساعات 08.00-دەگى جاعداي بويىنشا، ۋاقىتشا ەۆاكۋاسيالاۋ پۋنكتتەرىندە 171 ادام تۇرىپ جاتىر. ولارعا قاجەتتى جاعدايلار جاسالعان جانە ولارعا تاڭعى اس بەرىلگەن. ەۆاكۋاسيالاۋ جۇمىستارىنا 32 دارىگەر، ونىڭ ىشىندە تراۆماتولوگ، نەيروحيرۋرگ، حيرۋرگ، رەانيماتولوگ جانە ت.ب. دارىگەرلەر، 56 ورتا مەديسينالىق قىزمەتكەر قاتىستى. دارى-دارمەكتەرمەن قامتاماسىز ەتىلگەن»، - دەلىنگەن حابارلامادا.
ال جارىلىس سالدارىنان اۋرۋحاناعا تۇسكەندەردىڭ ىشىندە جاعدايى اۋىر 6 ادام جاتىر. جالپى، جارىلىستان زارداپ شەككەندەرگە جەدەل مەديسينالىق كومەك كورسەتۋ ءۇشىن 37 جەدەل مەديسينالىق جاردەم بريگاداسى، ونىڭ ىشىندە 3 مەديسينالىق اۆياسيا بريگاداسى جۇمىلدىرىلدى. ءبىر بريگادا تاراز قالاسىنىڭ №5 مەكتەبىندە، 1 بريگادا بايزاق اۋدانىنىڭ بازارباي اۋىلىنان بۇرىن 226 ادامدى ەۆاكۋاسيالاعان تاراز پوليتەحنيكالىق كوللەدجىندە كەزەكشىلىك ەتەدى.
«27 تامىز كۇنى ساعات 08.00-دە اۋرۋحانالاردا 28 ناۋقاس بار، ونىڭ 6-ى اۋىر حالدە. جامبىل وبلىسىنىڭ ءبىرىڭعاي ديسپەچەرلىك قىزمەتكە 473 ءوتىنىش كەلىپ تۇسكەن. ونىڭ ىشىندە 265 ءوتىنىش «109» قىسقا ءنومىرى بويىنشا، 190 ءوتىنىش WhatsApp مەسسەندجەرى ارقىلى جولدانعان. كەلىپ تۇسكەن قوڭىراۋلاردىڭ كوبى تۇرعىنداردى ەۆاكۋاسيالاۋ تۋرالى اقپارات پەن اسكەري بولىمدەگى قويمانىڭ جاي-كۇيى تۋرالى سۇراق قويىلۋدا»، - دەلىنگەن حابارلامادا.
بۇعان دەيىن وڭىردە توتەنشە وقيعاعا بايلانىستى «109» ءنومىرى مەن 8-778- 810-91-09 WhatsApp ارقىلى شۇعىل جەلى ىسكە قوسىلعانى حابارلاعان ەدى. تۇندەگى اقپارات بويىنشا اپات بولعان اۋماقتان ەۆاكۋاسيالانعان تۇرعىندارعا ارنالىپ، وبلىس ورتالىعىنان 400-دەن استام ورىن دايىندالعان. قوسىمشا 1 000-عا جۋىق ورىن دايىنداۋ مۇمكىندىگى قاراستىرىلعان. ونىڭ ىشىندە تاراز قالاسىندا 221 ادام ارنايى جاساقتالعان جاتىن ورىندارمەن قامتاماسىز ەتىلگەن.