اسكەري-اۋە كۇشتەرىنىڭ بولىمدەرىنە جاڭارتىلعان ۇشاقتار جەتكىزىلدى

چەح رەسپۋبليكاسىنان قازاقستانعا جاڭعىرتۋدان جانە كۇردەلى جوندەۋدەن وتكەن L-39 وقۋ-جاۋىنگەرلىك ۇشاقتارى جەتكىزىلدى.

ولار بۇرىن مەملەكەتتىك قورعانىس تاپسىرىسىنىڭ شارتى اياسىندا ءوندىرۋشى زاۋىتقا جوندەۋگە جىبەرىلگەن بولاتىن، دەپ حابارلايدى Almaty-akshamy.kz Elorda.info سايتىنا سىلتەمە جاساپ.

مودەرنيزاسيادان وتكەن ۇشاقتىڭ جاڭا سيفرلىق جانە كاتاپۋلتتىك جۇيەسى، وبەكتيۆتى باقىلاۋى، بايلانىس قۇرالدارى جانە تاعى باسقالارى جاڭاردى.

L-39 ۇشاعى كۋرسانتتاردى ۇشۋ تەحنيكاسىنا العاشقى ۇيرەتۋگە ارنالعان. وندا وقۋ ورىندارى مەن بولىمدەردىڭ ۇشۋ قۇرامىنىڭ جاتتىعۋلارى وتكىزىلەدى، اۋە نىسانالارىن ۇستاۋ، بايلانىستى جاۋىنگەرلىك ىس-ارەكەتتە قولدانۋ ەلەمەنتتەرى يگەرىلەدى، جەرۇستىندەگى نىسانالاردى زاقىمداۋ ءىس-قيمىلدارى پىسىقتالادى.

كۋرسانتتاردىڭ ۇشۋ تاجىريبەسىنە پايدالاناتىن ۇشاعى وسى. ولار ءۇشىن دەربەس ۇشۋ – ماڭىزدى. سەبەبى ۇشۋ شەبەرلىگىن يگەرۋدىڭ العاشقى قادامى باستالادى. بۇداي كەيىن ولارعا جاي جانە كۇردەلى پيلوتاجعا، باعىت بويىنشا، بۇلتتاردا، تومەن بيىكتىكتە ۇشۋعا رۇقسات بەرىلەدى، – دەدى اۆياسيالىق وقۋ-جاتتىعۋ ورتالىعىنىڭ كومانديرى، پولكوۆنيك ازامات اسانوۆ.

ەندى جاڭعىرتىلعان ۇشۋ اپپاراتتارىندا اۋە قورعانىسى كۇشتەرى اسكەري ينستيتۋتىنىڭ ءۇشىنشى كۋرس كۋرسانتتارى تاعىلىمدامادان وتۋدە. ۇشۋ باستالعانعا دەيىن بولاشاق ۇشقىشتار ۇشاقتىڭ تەوريالىق جانە ماتەريالدىق بولىگىن، ۇشۋ جۇمىسىن جانە ەرەكشە جاعدايلاردا ارەكەت ەتۋ ءتارتىبىن رەتتەيتىن قۇجاتتامانى زەردەلەدى. جاڭارتىلعان L-39 وقۋ-جاتتىعۋ جاۋىنگەرلىك ۇشاعىن مەڭگەرۋگە تاجىريبەلى ۇشقىش-نۇسقاۋشىلار كومەكتەسەدى.