بۇگىن ەلىمىزدىڭ شىعىس جانە باتىس وڭىرلەرىندە جاس شەكاراشى ساربازدار سالتاناتتى تۇردە انت قابىلداپ، وتانىنا ادال قىزمەت ەتۋگە سەرت بەردى. وسى ماڭىزدى ءساتتىڭ كۋاسى بولۋ ءۇشىن الىستان كەلگەن اتا-اجە، اكە-شەشە، تۋعان-تۋىستارى مەن دوستارىنىڭ جۇزدەرىنەن قۋانىش كورىنىپ تۇردى.
وسىنداي سالتاناتتىڭ ءبىرى ۇقك شەكارا قىزمەتىنىڭ الماتى وبلىسى بويىنشا دەپارتامەنتىنە قاراستى قاراساي اۋدانى شەكارا باسقارماسىنىڭ اقجارداعى تەحنيكالىق جانە كاسىبي دايارلىق بولىمىندە ءوتتى. جاس جاۋىنگەر سىنىن ءساتتى ەڭسەرگەن 500-دەن استام ساربازدى دەپارتامەنت باستىعى پولكوۆنيك ءا. كايۋپوۆ، «گەنەرالدار كەڭەسى» رەسپۋبليكالىق قوعامدىق بىرلەستىگىنىڭ ءتوراعاسى، وتستاۆكاداعى گەنەرال-لەيتەنانت ب. سارسەكوۆ، قازاقستان رەسپۋبليكاسى ماس-رەستلينگ (تاياق تارتۋ) فەدەراسياسىنىڭ ۆيسە-پرەزيدەنتى ت. قانالييەۆ جانە زاپاستاعى پولكوۆنيك د. مامىرحانوۆ باستاعان شەكاراشى ارداگەرلەر قۇتتىقتادى.
ۇقك شەكارا قىزمەتىنىڭ الەۋمەتتىك جەلىدەگى رەسمي پاراقشاسى ارقىلى ەل جۇرتشىلىعى تىكەلەي ەفيردەن تاماشالاعان راسىمدە اتا-انالاردىڭ قۋانىشتى جۇزدەرىن كورۋگە بولادى. ولاردىڭ ءبىرى، 75 جاستاعى ب. دۇيسەعالييەۆا تۇڭعىش نەمەرەسىنىڭ قۋانىشىنا ورتاقتاسۋ ءۇشىن باتىس قازاقستاننان ارنايى كەلىپتى. انت قابىلداۋعا كىرىسكەن نەمەرەسىنە مەيىرىممەن قاراپ تۇرعان تاعى ءبىر اجەيدى كورىپ، وسىناۋ اسەرلى ءساتتى سۋرەتكە ءتۇسىرىپ الۋعا تىرىستىق.
«گەنەرالدار كەڭەسى» رەسپۋبليكالىق قوعامدىق بىرلەستىگىن باسقاراتىن بەكسۇلتان سارسەك ۇلى سالتاناتتى شارانىڭ ماڭىزىنا توقتالا وتىرىپ:
— بۇگىنگى كۇن ەرەكشە! جاس ساربازدار تاۋەلسىز ەلدىڭ شەكاراسىن قورعاۋعا سەرت بەرۋدە. اتا-بابامىزدان امانات بولىپ قالعان ۇلان-عايىر جەرىمىزدى كوزدىڭ قاراشىعىنداي قورعاڭدار. حالقىمىزدىڭ سەنىمىن اقتاڭدار، — دەپ، اعالىق تىلەك ءبىلدىردى.
ايتا كەتۋ كەرەك، «سروچنيك 2.0» باعدارلاماسى اياسىندا «كۇز-2023» شاقىرىلىمىنىڭ ەكى ساربازى – قاتارداعى جاۋىنگەرلەر ا. ارتىقجانوۆ پەن ە. تىلەۋبەككە دەپارتامەنت باستىعى پولكوۆنيك الىبەك كايۋپوۆ ارنايى سەرتيفيكاتتار تابىستادى. بۇل سەرتيفيكاتتار ولارعا وزدەرى تاڭداعان جوعارى وقۋ ورىندارىندا ءبىلىم الۋعا مۇمكىندىك بەرەدى. سونداي-اق، شارا كەزىندە جاقىندا وتكەن «تاياق تارتۋ» سايىسىنىڭ جەڭىمپازى اتانعان بىرنەشە ساربازدى قازاقستان رەسپۋبليكاسى ماس-رەستلينگ فەدەراسياسىنىڭ ۆيسە-پرەزيدەنتى ت. قانالييەۆ ماقتاۋ قاعازى جانە مەدالدارمەن ماراپاتتادى.
شارا شەكارا باسقارماسىنىڭ ارنايى ماقساتتاعى ۇتقىر توپتىڭ جاۋىنگەرلىك قيمىلدارىنا ارنالعان كورىنىستەرىمەن جالعاستى. شەكارا قىزمەتىنىڭ قىزمەتتىك كينولوگيا باسقارماسى يتتەرىنىڭ شەبەرلىگىن كورسەتىپ، كورەرمەندەردى ءتانتى ەتتى.
انت قابىلداۋ راسىمىنەن كەيىن ساربازدار اتا-انالارى مەن تۋعان-تۋىستارىمەن قۋانىشپەن قاۋىشىپ، بولاشاق ەل قورعاندارى وزدەرىنىڭ ماقتانىش سەزىمدەرىن جاسىرا المادى.