شاقىرۋ قاعازىن العان ازاماتتار شاقىرۋ كوميسسياسىنا كەلمەيدى
قورعانىس مينيسترلىگى اسكەري كوميسساريات قىزمەتكەرلەرىنەن تەرەزە ارقىلى قاشقان كوللەدج ستۋدەنتتەرىڭ ارەكەتىنە قاتىستى پىكىر ءبىلدىردى، دەپ حابارلايدى Almaty-akshamy.kz.
الەۋمەتتىك جەلىلەردە «اسكەرگە اكەتپەك بولعان كوميسساريات قىزمەتكەرلەرىنەن تەرەزە ارقىلى قاشىپ بارا جاتقان كوللەدج ستۋدەنتتەرى»، دەگەن ءماتىنى بار ۆيدەو تارادى. بەينەماتەريالدا ايتىلعانداي، بۇل جاعداي ستۋدەنتتەردىڭ ديپلوم قورعاۋ ساتىندە بولعان.
وسى جاعدايعا بايلانىستى قورعانىس مينيسترلىگى اسكەري قىزمەتكە شاقىرۋعا جاتاتىن ازاماتتار جەرگىلىكتى باسقارۋ ورگانىنىڭ شاقىرۋ قاعازى بويىنشا كەلۋگە مىندەتتى ەكەنىن حابارلادى. شاقىرۋ قاعازىن جەرگىلىكتى اسكەري باسقارۋ ورگاندارىنىڭ وكىلدەرى ازاماتتىڭ جەكە وزىنە نەمەسە جۇمىس، وقۋ ورنىنىڭ ۇيىم باسشىسىنا تاپسىرادى.
«بۇل وقيعا وسىدان شامامەن 10 كۇن بۇرىن بولعان. ونىڭ نەگە سوڭعى بىرنەشە كۇندە بۇلاي تاراپ كەتكەنىن بىلمەيمىز. ءبىز ول اسكەرگە شاقىرىلعان جاستار مەن ولاردىڭ اتا-انالارىمەن سويلەستىك. ولار ديپلوم الىپ جاتقان تۇلەكتەر. سوندىقتان ولار وقۋدى اياقتاعان بولىپ سانالادى. تيىسىنشە مەديسينالىق تەكسەرىستەن ءوتۋ ءۇشىن كەلۋگە مىندەتتى. ولاردى اسكەري كوميسساريات قىزمەتكەرلەرى كۇشتەپ اكەتپەيدى. تەك ولاردى مەديسينالىق تەكسەرىسكە شاقىرعان»، - دەپ ءمالىم ەتتى مينيسترلىكتىڭ باسپا ءسوز قىزمەتى.
ۆەدومستۆو مالىمەتىنشە، ازاماتتاردى اسكەرگە شاقىرۋ جۇمىستارىن ۇيىمداستىرۋ، ورىنداۋ جەرگىلىكتى اكىمدىكتەرگە جۇكتەلەدى. سونىمەن قاتار منيسترلىك مەرزىمدى اسكەري قىزمەتكە ىرىكتەۋ بىرنەشە كەزەڭ بويىنشا جۇرگىزىلەتىنىن اتاپ ءوتتى. اۋەلى ازامات مەديسينالىق تەكسەرۋدەن، كەيىن پسيحولوگيالىق ىرىكتەۋدەن جانە اسكەري باسقارمانىڭ وكىلدەرىمەن اڭگىمەلەسۋدەن وتەدى.
«تاجىريبە كورسەتكەندەي، اسكەرگە شاقىرىلعاندار مەن ولاردىڭ اتا-انالارى زاڭناما تالاپتارىن ەلەمەيدى. شاقىرۋ قاعازىن العان ازاماتتار شاقىرۋ كوميسسياسىنا كەلمەيدى. ال ولاردى ماجبۇرلەپ اكەلۋ مۇمكىن ەمەس. سونداي-اق زاڭعا سايكەس شاقىرۋ قاعازىن ازاماتتىڭ جەكە وزىنە تاپسىرۋ مۇمكىن بولماعان جاعدايدا ونىڭ كەلۋىن قامتاماسىز ەتۋ مىندەتى ىشكى ىستەر ورگانىنا جۇكتەلەدى»، - دەپ حابارلادى ۆەدومستۆو.
قورعانىس مينيسترلىگىنىڭ مالىمەتىنشە، وقۋ ورنىنىڭ باسشىلىعىمەن كەلىسىلگەن تارتىپتە وقۋدى ءتامامداپ جاتقان تۇلەكتەرگە ءتۇسىندىرۋ جۇمىستارى جۇرگىزىلۋدە. سونىمەن قاتار ولاردىڭ اسكەري قىزمەتكە جارامدىلىعىن انىقتاۋ ءۇشىن مەديسينالىق كوميسسياعا شاقىرۋ قاعازدارى تاپسىرىلىپ جاتىر.