ارميانى پوليگوندىق جابدىقتارمەن جانە ترەناجەرلارمەن جاراقتاندىرۋ جالعاسىن تابۋدا
الماتىدا قۇرلىق اسكەرلەرى اسكەري ينستيتۋتىندا قورعانىس ۆەدومستۆوسىنىڭ باسشىسى گەنەرال-پولكوۆنيك رۋسلان جاقسىلىقوۆتىڭ باسشىلىعىمەن قورعانىس مينيسترلىگىنىڭ كوشپەلى القاسى ءوتتى، دەپ حابارلايدى Almaty-akshamy.kz.
وندا ەل پرەزيدەنتى – قارۋلى كۇشتەردىڭ جوعارعى باس قولباسشىسى قاسىم-جومارت توقايەۆتىڭ ءساۋىر ايىنداعى ۇكىمەتتىڭ كەڭەيتىلگەن كەڭەسى مەن بۇكىلارميالىق فورۋمدا بەرگەن تاپسىرمالارى اياسىندا باسقارۋ ورگاندارى مەن اسكەرلەر قىزمەتىنىڭ وزەكتى ماسەلەلەرى تالقىلاندى.
القاعا قورعانىس ءمينيسترىنىڭ ورىنباسارلارى، قارۋلى كۇشتەر تۇرلەرىنىڭ باس قولباسشىلارى، وڭىرلىك قولباسشىلىقتار اسكەرلەرى مەن اسكەر تەكتەرىنىڭ قولباسشىلارى، قۇرامالار مەن اسكەري بولىمدەردىڭ كومانديرلەرى قاتىستى.
– الەمدەگى اسكەري-ساياسي احۋالدىڭ دامۋى ەلدىڭ اسكەري قاۋىپسىزدىگىن قامتاماسىز ەتۋ جونىندەگى شارالاردى تۇزەتۋدى تالاپ ەتەدى، – دەپ اتاپ ءوتتى گەنەرال-پولكوۆنيك رۋسلان جاقسىلىقوۆ.
ول ۇلتتىق قاۋىپسىزدىككە، سىرتقى ساياسات تۇجىرىمداماسىنا، قارۋلى كۇشتەردىڭ قۇرىلىسى مەن دامۋىنا قاتىستى قۇجاتتارعا ءتيىستى وزگەرىستەر ەنگىزىلىپ جاتقانىن اتاپ ءوتتى.
قازاقستاننىڭ حالىقارالىق ارەناداعى بەدەلىن ارتتىرۋ ماقساتىمەن اسكەري باقىلاۋشىلار مەن شتاب وفيسەرلەرى رەتىندە بۇۇ-نىڭ بىتىمگەرلىك ميسسيالارىنا قاتىسۋ ءۇشىن جەكە قۇرامدى دايارلاۋ جالعاسىپ جاتىر.
اسكەري قاۋىپسىزدىكتى قامتاماسىز ەتۋگە جانە ەلدىڭ قورعانىس قابىلەتىن كۇشەيتۋگە باعىتتالعان شارالار كەشەنى ىسكە اسىرىلۋدا. جاۋىنگەرلىك دايارلىقتىڭ قارقىندىلىعىن ارتتىرۋ ءۇشىن جارتى جىلدىق وقىتۋ سيكلى ەنگىزىلدى. ارميانى پوليگوندىق جابدىقتارمەن جانە ترەناجەرلارمەن جاراقتاندىرۋ جالعاسىن تابۋدا.
تەحنيكا مەن وق-دارىلەر جوسپارلى تۇردە ساتىپ الىنۋدا. قارۋ-جاراق پەن تەحنيكانى كۇردەلى جوندەۋ، جاڭعىرتۋ جۇزەگە اسىرىلىپ جاتىر. اسكەري ينفراقۇرىلىمدى دامىتۋ جانە قالپىنا كەلتىرۋ جۇمىستارى جالعاسۋدا.
قورعانىس ءمينيسترىنىڭ ورىنباسارى – باس شتاب باستىعى گەنەرال-لەيتەنانت مارات قۇسايىنوۆ ءوز بايانداماسىندا قازىرگى زامانعى قارۋلى قاقتىعىستاردىڭ سيپاتىنا، اسكەرلەردىڭ جاۋىنگەرلىك جانە جۇمىلدىرۋ دايىندىعى ماسەلەلەرىنە توقتالدى. ول قارۋلى كۇشتەردى دامىتۋ جونىندەگى ءىس-شارالاردىڭ جوسپارلى ورىندالىپ جاتقانىن اتاپ ءوتتى.
قازىرگى زامانعى قارۋلى قاقتىعىستار كەزىندە جوعارى دالدىكتەگى قاشىقتىقتان زاقىمداۋ قۇرالدارىن، وق-دارىلەر مەن ۇشقىشسىز اۆياسياعا توسقاۋىل قويۋدى بەلسەندى قولدانۋ بايقالادى. قارسىلاستار كوبىنە ەنەرگەتيكالىق جانە كولىكتىك ينفراقۇرىلىم نىساندارىنا، قورعانىس-ونەركاسىپ كاسىپورىندارىنا، ءوق-دارى قويمالارىنا جانە مۇناي قويمالارىنا زيان كەلتىرۋگە تىرىسادى.
– اسكەرلەر داعدارىستىق جاعدايدا ىس-ارەكەت ەتۋگە ۇنەمى دايىن بولۋى كەرەك. سەرجانتتار قۇرامىن دايىنداۋعا ەرەكشە نازار اۋدارۋ قاجەت، – دەپ اتاپ ءوتتى باس شتاب باستىعى.