قازاقستان قارۋلى كۇشتەرىنىڭ اسكەري پوليسياسى باس باسقارماسى ازاماتتاردان ارمياداعى قۇقىقبۇزۋشىلىقتار تۋرالى اقپارات قابىلداۋ ءۇشىن ءموبيلدى قوسىمشاسى بار askeri-senim.kz سايتىن ازىرلەدى، دەپ حابارلايدى almaty-akshamy.kz ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
پايدالانۋشىلار اسكەري پوليسيا ورگاندارىنا ەلەكتروندىق فورماتتا ورنى مەن ۋاقىتىنا، تەرگەۋ جۇرگىزىلۋىنە، سونداي-اق حابارلاناتىن مالىمەتتەردىڭ تولىقتىعىنا قاراماستان، جاسالعان نەمەسە جاساۋعا ارەكەتتەنىپ جاتقان كەز كەلگەن قۇقىقبۇزۋشىلىق تۋرالى تىكەلەي حابارلامالاردى جولداي الادى. سايتتا ءموبيلدى قوسىمشا بارلىق Android جانە IOS قۇرىلعىلارىنا ورناتىلىپ، قوسا جۇمىس ىستەيدى. قوسىمشانى askeri-senim.kz سايتىنان جۇكتەپ الۋعا بولادى. اسكەري پوليسيا باس باسقارماسى مالىمدەگەندەي،
«اسكەري سەنىم» جوباسى ارمياداعى قۇقىقبۇزۋشىلىق، حابارلامالاردى قابىلداۋ، ەسەپكە الۋ جانە باقىلاۋ پروسەسىن اۆتوماتتاندىرۋ، قۇقىق بۇزۋشىلىقتى جاساۋ فاكتىلەرىنە دەن قويۋ ساپاسى مەن جەدەلدىگىن ارتتىرۋ جانە ولاردان ساقتاندىرۋ تۋرالى جاڭا اقپارات كوزدەرىن ەنگىزۋ ماقساتىندا ازىرلەندى. پايدالانۋشى جەكە كابينەتتە تاعايىندالعان جاۋاپتى لاۋازىمدى اداممەن جاسىرىن حات الماسۋ، ستاتۋسى مەن جاۋاپتاردى قاداعالاي الادى. ءوتىنىش ستاتۋسىنىڭ وزگەرگەنى، جاۋاپتى لاۋازىمدى ادامنىڭ تاعايىندالعانى جانە ونىڭ جاۋاپتارى تۋرالى وزەكتى دەرەكتەر ەلەكتروندىق پوشتاعا كەلىپ تۇسەدى.
پايدالانۋشىلارعا ىڭعايلى بولۋ ءۇشىن جەكە كابينەتتە ديالوگتاردى ىزدەۋگە جانە رەتتەۋگە بولادى.