ەلىمىزدە العاشقى بولىپ ەكپە سالدىرعان – مەملەكەتتىك قىزمەتشىلەر. ولاردان كەيىنگى قاتاردا ءوز دەنساۋلىعىنا بەيجاي قارامايتىن ەرىكتىلەر تۇر. بۇلاردان ءسال كەيىنىرەك ويلانىپ-تولعانىپ، ەكپەنىڭ پايداسى مەن زيانىن تارازىعا تارتىپ بارىپ، كەشتەۋ بولسا دا جاۋاپكەرشىلىك تانىتقاندار بولدى.
قازىرگى كەزدە ۆاكسينا سالدىرىپ جاتقانداردى دا ەكى توپقا بولۋگە بولادى: العاشقى توپ – توڭىرەكتىڭ ءبارى اۋىرىپ جاتقاندىقتان، ۆيرۋستان شىنىمەن قورقىپ بارىپ سانالى تۇردە ەكپە العاندار، ەكىنشىسى – جۇمىس ورنىنىڭ تالاپ ەتۋىمەن بارعاندار.
مەن دە ەكپە سالدىردىم. العاشقىدا ەكى ويلى بولعانىم راس. ءبىراق بالالارىمدى ويلادىم. اكەسى ەكەۋمىز جۇمىسقا بارامىز، ادام اعىلعان كوشەدە جۇرەمىز، سوندىقتان ەكپە سالدىرعانىم دۇرىس شىعار دەگەن ويعا توقتادىم. ەكپە سالدىرۋ ءوزىنىڭ دەنساۋلىعىنا، وتباسى مەن جاقىندارى الدىنداعى جاۋاپكەرشىلىگىنە بايلانىستى اركىمنىڭ جەكە شەشىمىمەن جۇزەگە اسادى.
اراسىنا 21 كۇن ۋاقىت سالىپ، ەكپەنىڭ ەكى دوزاسىن دا سالدىردىم. مەن بارعان ەمحانادا «سپۋتنيك V» عانا بار بولىپ شىقتى سول كەزدە. سوندىقتان مەن ۆاكسينانىڭ وسى ءتۇرىن سالدىردىم. ەل اراسىندا تاراعان «اۋرۋ-ساۋىڭا قاراپ جاتقان ەشكىم جوق، انىقتاماستان ەكپە سالىپ جاتىر» دەگەن فاكتىنىڭ وتىرىك-راستىعىن دا جۋرناليستىك قىزىعۋشىلىقپەن تەكسەرىپ كوردىم. مەن بارعان ەمحانانىڭ دارىگەرى قان قىسىمىمدى ولشەپ، جۇقپالى، تۇقىم قۋالايتىن اۋرۋلارىمنىڭ بار-جوعىن سۇراستىرىپ بارىپ، ەكپەگە جولداما بەردى. ەكپە سالدىرعاننان كەيىن جارتى ساعات كۇتۋ بولمەسىندە وتىرىپ، ۋاقىت وتكەن سوڭ، دارىگەرگە قايتا بارىپ، ناتيجەسىن ايتىپ كەتۋىمدى تالاپ ەتتى. ەكپەدەن كەيىن دەنساۋلىعىڭدا وزگەرىس بولىپ جاتسا دەپ، ىشۋگە بولاتىن دارى-دارمەكتىڭ ءتىزىمىن ايتتى.
ەكى كومپونەنتتەن كەيىن دە مەندە قان قىسىمىنىڭ وزگەرىسى، السىزدىك پەن تەرشەڭدىك بولدى. سول سەبەپتى ءبىر اپتا قاشىقتان جۇمىس ىستەۋگە رۇقسات الدىم. جولداسىم جۇمىستا ءجۇرىپ ەكپە سالدىرسا دا، دەنساۋلىعىندا ەش وزگەرىس بولعان جوق. سوندىقتان بۇل وزگەرىستەر ءار ادامنىڭ اعزاسىنىڭ دايىندىعىنا، ەرەكشەلىگىنە بايلانىستى بولار دەپ ويلادىم. دارىگەردەن سۇراعانىمدا، بۇل ويىمدى راستادى.
جاڭا وقۋ جىلى جاقىنداپ قالعاندىقتان، اتا-انا رەتىندە بالامىزدىڭ دەنساۋلىعى ءۇشىن الاڭدايمىز. ءبىر جارىم جىلدىق ونلاين وقۋدىڭ تيگىزگەن كەسىرىن دە بىلەمىز. بالالارىمىزدىڭ ساپالى ءبىلىم الىپ، مەكتەپكە ورالۋى ءۇشىن ەكپە سالدىرۋعا سالعىرت قاراماعانىمىز ءجون.