قارۋلى كۇشتەردىڭ قىزمەتكەرى مارات بايقامۇروۆ جارىستىڭ جەڭىمپازى اتاندى
اسكەري قىزمەتشىلەر اراسىندا وتكەن «اسكەر بارىسى» ىرىكتەۋ ءتۋرنيرى قورعانىس مينيسترلىگى ورتالىق سپورت كلۋبى – سپورت كوميتەتىنىڭ الماتىداعى بازاسىندا ۇيىمداستىرىلدى، دەپ حابارلايدى Almaty-akshamy.kz.
سايىستا قارۋلى كۇشتەردىڭ، شەكارا قىزمەتىنىڭ، ۇقك-نىڭ ەڭ مىقتى دەگەن جيىرما بالۋانى «اسكەر بارىسى» اتاعى ءۇشىن كۇرەستى.
– قازاق كۇرەسى – ءتول سپورتىمىز. بالۋانداردىڭ كۇش سىناسۋى قاشاننان حالىقتىق ونەردىڭ اجىراماس ءبىر بولىگى بولىپ سانالعان. بۇگىن «اسكەر بارىسى» الاڭىندا قاجىمۇقاننىڭ، بالۋان شولاق پەن ءيمانجۇسىپتىڭ داڭقتى داستۇرلەرىن جالعاستىرۋشى مىقتى بالۋاندار جينالدى. سپورتشىلار جارقىن، قارقىندى كۇرەس كورسەتە ءبىلدى. ۇزدىكتەر رەسپۋبليكالىق تۋرنيردە قارۋلى كۇشتەردىڭ نامىسىن قورعايتىن بولادى، – دەدى قورعانىس مينيسترلىگى اپپاراتىنىڭ باسشىسى، پولكوۆنيك ەربول قۇماربەك ۇلى
ورتالىق سپورت كلۋبىنىڭ سپورتشىسى، قارۋلى كۇشتەردىڭ قىزمەتكەرى مارات بايقامۇروۆ جارىستىڭ جەڭىمپازى اتاندى. ەكىنشى ورىندى ورتالىق سپورت كلۋبىنىڭ تاعى ءبىر وكىلى، قارۋلى كۇشتەردىڭ قىزمەتكەرى عالىمجان قىرىقبايەۆ يەلەندى. ال «شىعىس» وڭىرلىك قولباسشىلىعىنىڭ اسكەري قىزمەتشىسى، اعا سەرجانت اسىلجان قۋانىشبەكوۆ ءۇشىنشى ورىن الدى.
وسىلايشا، ەلىمىزدىڭ مىقتى بالۋاندارى جينالاتىن «قازاقستان بارىسى» تۋرنيرىندە قورعانىس مينيسترلىگى ورتالىق سپورت كلۋبىنىڭ سپورتشىلارى مارات بايقامۇروۆ پەن عالىمجان قىرىقبايەۆ ونەر كورسەتەتىن بولدى.