باعدارلاماعا ءوتىنىم قابىلداۋ كەزەڭى 31 ناۋرىزعا دەيىن جالعاسادى
بيىل حالىق قاتىساتىن بيۋدجەت باعدارلاماسىن قارجىلاندىرۋ وسەدى. بۇل تۋرالى الماتى قالالىق قارجى باسقارماسىنىڭ ماماندارى مالىمدەدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
جەتىسۋ اۋدانىنداعى ءبىر جىل بۇرىن ارام ءشوپ باسىپ تۇرعان اۋلا «حالىق قاتىساتىن بيۋدجەت» باعدارلاماسى اياسىندا الدەقايدا تۇرلەنگەن. زاماناۋي سپورت جابدىقتارى مەن فۋتبول الاڭى سالىنعان. وسىلايشا، تۇرعىنداردىڭ تالاپ-تىلەگىنە سايكەس، شاعىن اۋماق ءتيىمدى قولدانىلعان. ءقازىر مۇنداعى جۇرت پەن بالالار قالالىق باعدارلامانىڭ يگىلىگىن كورىپ وتىر.
«جاي عانا الاڭ بولدى، جاڭبىر جاۋسا، جەر بالشىق بولاتىن. بالالار ويناي المايتىن ەدى. ءقازىر الماتىدا مۇنداي الاڭدار تەك جاڭا تۇرعىن ءۇي كەشەندەرىندە عانا سالىنادى عوي. ءبىز تۇرىپ جاتقان ەسكى ءۇي 1979 جىلى سالىنعان»، – دەدى جەتىسۋ اۋدانىنىڭ تۇرعىنى ەرعازى ىقىلاس.
بيىل دا تۇرعىندار قالالىق باعدارلاماعا ءۇمىت ارتىپ وتىر. جەرگىلىكتى جۇرت بيۋدجەتتەن بولىنگەن قارجىنى ءتيىمدى پايدالانۋدى كوزدەيدى.
«بيىل دا جوسپار كوپ. تۇرعىن ءۇيدىڭ سىرتىن سىرلاساق. تۋزوۆ كوشەسى تۇيىقتا ورنالاسقان. وندا تۇرعىندار جۇرەتىن تروتۋار جوق. ويىمىزدى اكىمدىككە ايتساق، قولدايدى دەپ سەنەمىز»، – دەدى جەتىسۋ اۋدانىنىڭ تۇرعىنى دۋلات قىلىشبەكوۆ.
باعدارلاما اياسىندا جاسالاتىن ءاربىر جوبا حالىقتىڭ تالاپ-تىلەگىمەن، تۇرعىنداردىڭ تالعامىنا قاراي جاسالادى. جەتىسۋ اۋدانى بويىنشا وتكەن جىلى 45 ءوتىنىم قابىلدانعان. 23 جوبا كوپ داۋىس جيناپ، جۇزەگە اسقان.
«حالىقتان سۇرانىس كوپ بولعاندىقتان قالا اكىمىنىڭ تاپسىرماسىمەن قوسىمشا اقشا ءبولىنىپ جاتىر. ويىن الاڭى بۇزىلعان جاعدايدا جاۋاپتى مەردىگەر مەكەمە ءبىر جىلدىق كەپىلدىك حات بويىنشا قايتادان قالپىنا كەلتىرۋ جۇمىسىن جۇرگىزۋگە مىندەتتى»، – دەدى جەتىسۋ اۋدانى اكىمى اپپاراتى كوممۋنالدىق شارۋاشىلىق ءبولىمىنىڭ باسشىسى نۇرداۋلەت قالداروۆ.
باعدارلاماعا ءوتىنىم قابىلداۋ كەزەڭى 31 ناۋرىزعا دەيىن جالعاسادى. تۇرعىندار open-almaty.kz سايتى ارقىلى وزىنە قاجەتتى جوبانى تاڭداسا بولادى. 2019 جىلى پيلوتتىق جوبا رەتىندە باستالعان باعدارلاماعا باستاپقىدا 8 ملرد تەڭگە بولىنگەن بولاتىن. بيىلدان باستاپ بۇل قارجى 15 ملرد تەڭگەگە دەيىن وسكەن.