ايسۇلتان سەيىتوۆتىڭ «قاش» ءفيلمى Asian Pacific Screen Awards سىيلىعىنىڭ «ۇزدىك فيلم» جانە «ۇزدىك وپەراتورلىق جۇمىس» نوميناسيالارىنا ۇمىتكەر اتاندى، دەپ حابارلايدى اlmaty-akshamy.kz Qara production-عا سىلتەمە جاساپ.
ماراپاتتاۋ ءراسىمى 3 قاراشادا اۋستراليانىڭ گولد-كوست قالاسىندا وتەدى. 2007 جىلى قۇرىلعان، بەدەلدى Asia Pacific Screen Awards ماراپاتى ازيا-تىنىق مۇحيتى ايماعىنداعى 70-تەن استام ەل مەن ايماق رەجيسسەرلەرىنىڭ جۇمىسىن كورسەتەدى.
«قاش» فيلمىندە 1930 جىلدارداعى جاپپاي اشارشىلىق تۋرالى باياندالعان. فيلم سيۋجەتى بويىنشا ءقابىر قازۋشى يساتاي ءوز اۋىلىن قۇتقارۋعا اتتانادى. شەكسىز دالا تۇنەككە اينالىپ، يساتايدىڭ ساناسىن ەكى كۇش – كەڭىستىك پەن اشتىق بيلەيدى.
بۇعان دەيىن فيلم 25ء-شى شانحاي كينوفەستيۆالىندە «ۇزدىك رەجيسسەر» اتالىمىنا يە بولدى. سونداي-اق قازاقستان كينوسىنشىلار قاۋىمداستىعىنىڭ «ۇزدىك دەبيۋت»، «ەكىنشى پلانداعى ۇزدىك ايەل ءرولى»، «ۇزدىك مۋزىكا» جانە «ۇزدىك فوتورەجيسسەر» نوميناسيالارىندا جەڭىسكە جەتتى.