دۇنيەجۇزىلىك مەلانوما جانە تەرى قاتەرلى ىسىگىمەن كۇرەس كۇنى اياسىندا الماتىنىڭ ونكولوگيالىق ورتالىعىندا (پاپانين كوشەسى، 220، ليتەر ا) 26 مامىردا ساعات 9.00-دەن 13.00-گە دەيىن تەرى وبىرىن ەرتە انىقتاۋ بويىنشا اشىق ەسىك كۇنى وتەدى، دەپ حابارلايدى almaty-akshamy.kz الماتى قالاسى دەنساۋلىق ساقتاۋ باسقارماسىنا سىلتەمە جاساپ.
قالا تۇرعىندارى مەن قوناقتارى مامانداردىڭ كەڭەسىن الىپ، العاشقى تەرى تەكسەرۋىنەن وتە الادى.
الماتىدا جىل سايىن مىڭعا جۋىق جاڭا جاعداي انىقتالسا، 3،5 مىڭعا جۋىق ادام تەرى قاتەرلى ىسىگى دياگنوزىمەن الماتى ونكولوگيالىق ورتالىعىندا ەسەپتە تۇر. ونكولوگ ەرلان اسەتىللانىڭ ايتۋىنشا، قاتەرلى ىسىكتىڭ بۇل ءتۇرى تەز جانە اگرەسسيۆتى دامۋىمەن ەرەكشەلەنەدى.
بىرىكتىرىلگەن جانە كەشەندى ەمدەۋدىڭ زاماناۋي ادىستەرى وسىنداي اۋىر سىرقاتپەن ءتيىمدى كۇرەسۋگە، ونكولوگتىڭ ەرتە دياگنوستيكانى انىقتاۋىنا، اۋرۋدى باستاپقى كەزەڭدە ەمدەۋگە ۇلكەن مۇمكىندىك بەرەتىنىن اتاپ ءوتتى.
ەرلان اسەتىللا تەرى قاتەرلى ىسىگى باستاپقى كەزەڭىندە ىسىكتىڭ پايدا بولۋى نەمەسە بار مەڭنىڭ ءتۇسى، ولشەمى مەن ءپىشىنىنىڭ وزگەرۋى سياقتى بەلگىلەرىنەن كورىنەتىنىن ايتتى. سونداي-اق، ناۋقاس ءتۇزىلىم ايماعىندا قىشۋ، اۋىرسىنۋ جانە جانۋ سەزىمىنە شاعىمدانۋى مۇمكىن.
ونكولوگ ءبىرقاتار بەيىمدى فاكتورلاردى اتادى: شامادان تىس ينسالياسيا نەمەسە كۇن ساۋلەلەرىنىڭ بەلسەندى اسەر ەتۋى، تۇقىم قۋالاۋشىلىق، بەلگىلى ءبىر فوتوتيپتەگى سەپكىلدەر، تەرى مەن كوزدىڭ اشىق ءتۇسى، دەنەدە كوپتەگەن مەڭنىڭ (نيەۆۋس) ورىن الۋى.
مامان دەنساۋلىعىن ويلايتىن ادامداردى مەڭدەرگە ءتيىستى نازار اۋدارۋدى سۇرادى. ونىڭ ايتۋىنشا، ەگەر ادامنىڭ بەتىندە جانە دەنەسىندە جاڭا نيەۆۋس پايدا بولسا نەمەسە بار مەڭدەرىنىڭ ءتۇسى، ءپىشىنى وزگەرە باستاسا نەمەسە كولەمى ۇلعايا باستاسا، دارىگەردىڭ كەڭەسى قاجەت.
سونداي-اق، ۇزاق ۋاقىت جازىلمايتىن جارالار مەن قان كەتەتىن نەمەسە ادەتتەن تىس سۇيىقتىق اعىپ كەتەتىن مەڭدەر بولسا، ولاردىڭ قۇرىلىمى وزگەرسە، قىشىپ، اۋىرسىنعان نەمەسە ۇيۋ ورىن العان بولسا، وعان ءمان بەرۋ كەرەك.