مەملەكەت باسشىسىنىڭ تاپسىرماسىنا سايكەس مينيسترلىك 2023 جىلعى اۋىل شارۋاشىلىعى ماۋسىمى اياسىندا اۋا رايىنان زارداپ شەككەن فەرمەرلەردىڭ قارىزدارىن ۇزارتۋ بويىنشا شارالار قابىلداۋدا، دەپ حابارلايدى Almaty-akshamy.kz.
وسىلايشا، اۋىلشارۋاشىعى مينيسترلىگى اگروونەركاسىپتىك كەشەن سۋبەكتىلەرىنە نەسيە بەرۋ، سونداي-اق اۋىل شارۋاشىلىعى جانۋارلارىن، تەحنيكا مەن تەحنولوگيالىق جابدىقتاردى ساتىپ الۋ ليزينگى كەزىندە سىياقى مولشەرلەمەلەرىن سۋبسيديالاۋ قاعيدالارىنا وزگەرىستەر ەنگىزدى.
قابىلدانعان جاڭالىقتار قارىز الۋشى ءۇشىن ناشارلاتاتىن جاعدايلاردىڭ تۋىنداۋىنا بايلانىستى سىياقى مولشەرلەمەسىن تولەۋ جانە (نەمەسە) نەگىزگى قارىزدى وتەۋ مەرزىمىن 10 ايدان 24 ايعا دەيىن ۇزارتۋعا مۇمكىندىك بەرەدى.
بۇعان دەيىن «كەڭ دالا» كوكتەمگى ەگىس جانە ەگىن جيناۋ جۇمىستارىن نەسيەلەندىرۋ بويىنشا جەڭىلدىكتى باعدارلاما مەن ۇزارتۋ شارالارى شەڭبەرىندە بيۋدجەتتىك نەسيەنى قايتا قۇرىلىمداۋ جۇرگىزىلدى. بۇل باعدارلاما قاتىسۋشىلارىنا قارىزداردى ايىپپۇل سانكسيالارىن قولدانباي ۇزارتۋعا مۇمكىندىك بەردى.
جوعارىدا كورسەتىلگەن بيۋدجەتتىك كرەديتتى قايتا قۇرىلىمداۋدان تىس قارىزداردى ۇزارتۋدى جۇرگىزۋ قاجەت بولعان جاعدايدا بيۋدجەت قاراجاتىن قارجى ينستيتۋتىنىڭ مەنشىكتى نە تارتىلعان قاراجاتىنا اۋىستىرۋ جولىمەن ۇزارتۋدى جۇرگىزۋ كوزدەلگەن. بۇل رەتتە وسىنداي ۇزارتىلعان قارىزدار بويىنشا قارجىلاندىرۋ مولشەرلەمەسى نارىق جاعدايىندا قالىپتاسادى جانە 19-20% -دان اسۋى مۇمكىن.
وسىعان بايلانىستى، تۇپكىلىكتى قارىز الۋشى – فەرمەر ءۇشىن سىياقى مولشەرلەمەسىن تومەندەتۋدى قامتاماسىز ەتۋ ماقساتىندا قاعيدالاردا سۋبسيديالاۋ باعدارلاماسىنا نارىقتىق مولشەرلەمە بويىنشا ۇزارتىلعان كرەديتتىك كەلىسىمدەردىڭ قاتىسۋ مۇمكىندىگى قاراستىرىلعان. تيىسىنشە، اۋىل شارۋاشىلىعى سۋبەكتىلەرى ەڭبەكاقى مولشەرلەمەسىن 6 پايىزعا دەيىن تومەندەتۋگە مۇمكىندىك الادى، ال ايىرماشىلىقتى مەملەكەت تولەيدى.
اۋىل شارۋاشىلىعى مينيسترلىگىنىڭ ءتيىستى بۇيرىعى 2023 جىلعى 29 جەلتوقساندا مەملەكەتتىك تىركەۋدەن ءوتتى جانە العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى.
ەسكە سالايىق، جالپى 2024 جىلى اتالعان باعدارلاما بويىنشا سىياقى مولشەرلەمەلەرىن سۋبسيديالاۋ ماقساتىندا جەرگىلىكتى اتقارۋشى ورگانداردان 87،2 ملرد تەڭگە بيۋدجەت قاراجاتى قاراستىرىلعان.