بۇگىن ماجىلىستە اتىشۋلى قۇرىلىس كودەكسى جوباسى ءبىرىنشى وقىلىمدا قارالدى. بۇل قۇجات قازاقستانداعى قۇرىلىس سالاسىن تۇبەگەيلى وزگەرتەتىن نەگىزگى زاڭداردىڭ ءبىرى بولماق. ءماجىلىس دەپۋتاتى باقىتجان بازاربەك ءوز بايانداماسىندا جاڭا كودەكستىڭ قوعام ءۇشىن ماڭىزىن اتاپ ءوتتى، - دەپ حابارلايدى اqshamnews.kz ءتىلشىسى.
“بۇل زاڭعا قوعامىمىزداعى كوپ نارسە بايلانىستى. ءقاۋىپسىز ۇيلەردە تۇرامىز با، الدە ءقاۋىپتى جاعدايلاردا ءومىر سۇرەمىز بە - زاڭ سوعان جاۋاپ بەرەدى. ءبىز ەندى قۇرىلىس كومپانيالاردىڭ ەمەس، حالىقتىڭ مۇددەسىن قورعاۋىمىز كەرەك”، - دەدى دەپۋتات.
30 جىلدىق "بەتون گەتتولار" ءداۋىرى
دەپۋتاتتىڭ ايتۋىنشا، تاۋەلسىزدىك العان جىلداردان بەرى زاڭدار مەن شەشىمدەر كوبىنە قۇرىلىس كومپانيالاردىڭ پايداسىنا قابىلدانىپ كەلگەن.
“تاۋ بوكتەرى كەسىلىپ، جاسىل ايماق ازايدى، قالالار بەتون گەتتوسىنا اينالدى. سەبەبى اشكوز قۇرىلىس كومپانيالار مەن ولاردىڭ لوببيستەرى 30 جىل بويى ءوز مۇددەلەرىن قورعاپ كەلدى”، - دەدى ول.
بازاربەك بۇل زاڭدى مەملەكەت، قۇرىلىس يندۋسترياسى جانە ازاماتتىق قوعام اراسىنداعى “الەۋمەتتىك كەلىسىم” دەپ اتادى.
سەيسميكالىق قاۋىپسىزدىك جانە جاسىل ايماقتار باستى نازاردا بولماق
دەپۋتات ۇسىنعان ءبىرقاتار ماڭىزدى تۇزەتۋ جۇمىس توبى تاراپىنان قولداۋ تاپقان:
-
سەيسميكالىق قاۋىپسىزدىك:
ەندى باس جوسپارلار مەن جوبالار سەيسموميكروزونيرلەۋ كارتالارى نەگىزىندە ازىرلەنەدى. ال الماتىدا بۇل تالاپتار بىردەن كۇشىنە ەنەدى، باسقا سەيسموقاۋىپتى قالالاردا - 2030 جىلعا دەيىن. -
ءقاۋىپتى ايماقتاردا قۇرىلىسقا تىيىم:
وپىرىلۋ ءقاۋپى بار نەمەسە تاۋلى ايماقتاردا كوپقاباتتى ۇيلەر سالۋعا شەكتەۋ قويىلادى. -
جاسىل ايماقتاردى قورعاۋ:
رەكرەاسيالىق اۋماقتاردى تۇرعىن ايماققا اۋىستىرۋ تەك قوعامدىق تالقىلاۋدان كەيىن عانا مۇمكىن بولادى.“ەگەر حالىق قارسى بولسا، وندا وزگەرىس بەكىتىلمەيدى. بۇل الماتى، قاراعاندى، شىمكەنت سياقتى قالالارداعى جاعدايدىڭ قايتالانباۋى ءۇشىن قاجەت”، - دەدى بازاربەك.
-
پدپ تۇزەتۋلەرىن شەكتەۋ:
بۇدان بىلاي قالا قۇرىلىسى جوبالارىنا جىلىنا ەكى رەت ەمەس، ەكى جىلدا ءبىر رەت تۇزەتۋ ەنگىزۋ ۇسىنىلادى. بازاربەك ءتىپتى بۇدان دا قاتالداۋ نۇسقانى - بەس جىل بويى وزگەرىس ەنگىزبەۋ تالابىن ەنگىزۋدى ۇسىنعان.
"جاۋاپسىز قۇرىلىسشىلاردى جازالاۋ قاجەت"
دەپۋتات ادال ەمەس قۇرىلىس كومپانيالارىنىڭ ءتىزىمىن (رەەستر نەدوبروسوۆەستنىح زاسترويششيكوۆ) ەنگىزۋ باستاماسىن دا كوتەردى. بۇل تىزىمگە سوت شەشىمىمەن “الاياق قۇرىلىسشىلار” ەنگىزىلىپ وتىرادى.
“حالىقتىڭ اقشاسىن جەپ، رۇقساتسىز، ءقاۋىپتى ايماقتاردا قۇرىلىس جۇرگىزەتىندەرگە بۇل كودەكس جەڭىل تيمەيدى. ءبىز وندايلاردى قۇرتۋىمىز ەتۋىمىز كەرەك”، - دەپ قاتاڭ ايتتى بازاربەك.
ليسەنزيا مەن ساراپتاماداعى بىلىقتار
دەپۋتات ساراپتاما جانە ليسەنزيا بەرۋ سالاسىندا دا ءتارتىپ ورناتۋ قاجەتتىگىن ايتتى.
مىسالى، 2016–2023 جىلدار ارالىعىندا جەكە ساراپتامالىق ۇيىمدار 87 مىڭنان استام قورىتىندى بەرگەن، ونىڭ ىشىندە كەيبىرى نەبارى 0 كۇندە جاسالعان.
“ءبىر كۇندە ساراپتاما جاساپ، وڭ قورىتىندى بەرۋ - بۇل تەحنيكالىق ساراپتاما ەمەس، فارس”، - دەدى دەپۋتات.
سونداي-اق، ەلدە 93 مىڭنان استام قۇرىلىس ليسەنزياسى بەرىلگەنىمەن، ءار كومپانيادا ورتا ەسەپپەن 1،38 ينجەنەر عانا بار. بۇل - زاڭ بۇزۋشىلىقتىڭ ايقىن دالەلى.
“الدىمىزدا ۇلكەن جۇمىس تۇر. ءبىز بۇل رەفورمانى قۇرىلىس كومپانيالار ءۇشىن ەمەس، حالىق ءۇشىن جاسايمىز. قالالارىمىزدا زاڭ ۇستەمدىك ەتۋى كەرەك”، - دەپ تۇيىندەدى ءماجىلىس دەپۋتاتى باقىتجان بازاربەك.