ءبىلىم جانە عىلىم مينيسترلىگىنىڭ اپپارات جينالىسىندا مينيستر اسحات ايماعامبەتوۆ وقۋ باعدارلامالارى جاڭارتىلاتىنىن ايتتى، دەپ حابارلايدى اlmaty-akshamy.kz

ورتا ءبىلىم بەرۋ سالاسىنداعى باستى مىندەت – وقۋ باعدارلامالارىن جاڭارتۋ. اسىرەسە، مۇعالىمدەر باعدارلامانىڭ كەيبىر تۇستارىن جوندەۋ كەرەگىن ايتىپ ءجۇر. ونى ساراپشىلار دا كوتەرگەن بولاتىن. بۇل سىن ورىندى. باعدارلامالاردىڭ كەمشىلىكتەرىن تۇزەۋ كەرەك. بۇل – اۋقىمدى، كۇردەلى، ماڭىزدى جۇمىس. ونىمەن اينالىساتىن جۇمىس توبى قۇرىلدى. ولار شتاتتىق رەجيمدە جۇمىس ىستەۋلەرى كەرەك. ونلاين فورماتتا ونىڭ تيىمدىلىگى جوعارى بولمايدى، - دەدى بعم باسشىسى.

ءمينيستردىڭ سوزىنشە، جۇمىس توبىنىڭ قۇرامىنا ادىسكەرلەر، ەلدىڭ ۇزدىك مۇعالىمدەرى، عالىمدار، ساراپشىلار مەن ماماندار تارتىلۋى كەرەك.

- وقۋ ماقساتتارى تىم كۇردەلى، قايتالاۋعا ۋاقىت از، جاس ەرەكشەلىگى تۇرعىسىنان ەرتە بەرىلگەن تاقىرىپتارعا قاتىستى سىن-پىكىرلەر كوپتەن بەرى ايتىلىپ ءجۇر. سول سەبەپتى وسى باعىت بويىنشا جۇمىس ىستەۋىمىز كەرەك. بۇل باعدارلامالار  2015 جىلى بەكىتىلىپ، وعان 2016 جىلدان 2021 جىلعا دەيىن مەكتەپتەر كەزەڭ-كەزەڭىمەن كوشتى. ارينە، ورتا جولدا توقتاتىپ قويىپ، وعان وزگەرىستەر ەنگىزۋگە دە بولمايدى. ەندى ولاردىڭ ءتيىمدى دە، ءتيىمسىز جاقتارىن بايقاعان سوڭ كەشەندى جۇمىستى جۇرگىزۋىمىز قاجەت، - دەپ اتاپ ءوتتى اسحات ايماعامبەتوۆ اپپارات جينالىسىندا.

باس ۇستاز اتاپ وتكەندەي، تيپتىك وقۋ باعدارلامالارىن جاڭارتقاننان كەيىن تيپتىك وقۋ جوسپارلارى بويىنشا دا جۇمىس جۇرگىزىلەدى.