كوللەدجدەرگە ءتيىمدى فورمات
ق ر وقۋ-اعارتۋ ءمينيسترى اسحات ايماعامبەتوۆ ەلدەگى كوللەدجدەردىڭ باسقارۋ فورماسىن «شارۋاشىلىق ءىس جۇرگىزۋ قۇقىعىنا» اۋىستىرۋدى ۇسىندى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«كەيبىرەۋلەر «شارۋاشىلىق جۇرگىزۋ قۇقىعىنان» (شجق) قورقادى، ءبىراق ۇيىمداستىرۋ-قۇقىقتىق فورماسى ءتيىمسىز بولعاندىقتان ەمەس، جان باسىنا قارجىلاندىرۋدان قورقادى. ءبىز بىرنەشە كوللەدجگە تالداۋ جۇرگىزدىك. مىسالى، شاعىن كوللەدجدە 120 ستۋدەنت، جەتى ورىنباسار بار، توپتار از. ءتىپتى مەملەكەتتىك تاپسىرىس سوماسىن 800 مىڭ تەڭگەگە دەيىن كوتەرسەك تە، بۇل قارجى كوللەدجگە جەتپەي جاتادى. شتاتتاردىڭ تيپتىك ەرەجەلەرى بار ەكەنى تۇسىنىكتى، ءبىراق بۇل شتاتتىڭ بارلىعىن ۇستاپ تۇرۋعا ەشكىم ماجبۇرلەمەيدى، كەرىسىنشە، شجق فورماتى كوللەدج ديرەكتورىنا قارجىنى ۇنەمدەۋگە مۇمكىندىك بەرەدى. ورىنباسارلاردى ازايتىپ، سول اقشانى باسقا نارسەلەرگە باعىتتاي الاسىز. نەمەسە ورىنباساردىڭ ورنىنا ادۆوكاتتى نەمەسە مەملەكەتتىك ساتىپ الۋشىنى جۇمىسقا الۋعا بولادى. ياعني، شجق-داعى فورمات كوللەدجدەرگە ءتيىمدى»، - دەدى مينيستر ەلوردادا وتكەن تامىز كونفەرەنسياسىنىڭ «ەڭبەك نارىعى جانە كاسىپتىك ءبىلىم: جاڭا مۇمكىندىكتەر» پانەلدىك سەسسياسىندا.
ا. ايماعامبەتوۆ كوللەدجدەر سمەتا بويىنشا ەمەس، ءاربىر ستۋدەنتتى ەسكەرە وتىرىپ قارجىلاندىرىلاتىنىن ەسكە سالدى. بۇل جۇيەگە ۇيرەنىپ، كومفورت ايماعىنان شىعىپ، ستۋدەنتتەردى تارتۋدى ۇيرەنۋ كەرەك.
«ءبىر ستۋدەنتكە بولىنگەن تۇتاس قاراجات وسى كوللەدجگە تۇسەدى. ۇنەمدەۋدى كورىپ، ۇنەمدەلگەن قاراجاتتى الىپ قويۋ بولمايدى. بۇل جاعدايدا كوللەدجدە ۇنەمدەۋگە، قوسىمشا شتاتتاردى جابۋعا، باسقا شتاتتاردى ەنگىزۋگە جانە باسقالارىنا ىنتالاندىرۋ بولمايدى»، - دەپ تولىقتىردى مينيستر.