بۇل جيناقتىڭ العاشقى ءۇش تومى ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى قارساڭىندا جارىق كورگەن ەدى.
سەنات ءتوراعاسى ماۋلەن اشىمبايەۆتىڭ قاتىسۋىمەن «اشارشىلىق. گولود. 1928-1934. دوكۋمەنتالنايا حرونيكا» جيناعىنىڭ IV-V تومدارى كوپشىلىككە تانىستىرىلدى، دەپ حابارلايدى Almaty-akshamy.kz
ءىس-شارا بارىسىندا ماۋلەن اشىمبايەۆ مۇنداي ەڭبەكتىڭ تاۋەلسىزدىكتىڭ 30 جىلدىعى قارساڭىندا باسىلىپ شىعۋىنىڭ ماڭىزى زور ەكەنىنە نازار اۋداردى. ول ءوز سوزىندە ەگەمەندىك العالى ەلىمىز تاريحىمىزدى تانۋ جولىندا تولايىم تابىسقا قول جەتكىزگەنىن اتاپ ءوتتى.
«ءبىز تاۋەلسىزدىگىمىزدىڭ 30 جىلدىق تاريحي مەجەسىن ايتۋلى جەتىستىكتەرمەن قارسى الىپ وتىرمىز. وسى ارالىقتا تاريحىمىزدى تانۋ، رۋحانياتىمىزدى دارىپتەۋ جانە ۇلتتىق قۇندىلىقتارىمىزدىڭ ءورىسىن كەڭەيتۋ جولىندا اۋقىمدى جۇمىس اتقارىلدى»، – دەدى سەنات ءتوراعاسى.