مەملەكەت باسشىسىنىڭ جىل سايىنعى داستۇرگە اينالعان جولداۋى ەل دامۋىنىڭ باسىم باعىتتارىن ايقىنداپ، ونىڭ كەلەشەگىنە باتىل قادامدار جاسايتىن باستى قۇجات. بيىلعى جولداۋ دا وسى مىندەتتەر ۇدەسىنەن كورىندى دەپ نىق سەنىممەن ايتۋعا بولادى.
مەنى كوپتەن بەرى تولعاندىرىپ، وزەگىمدى ورتەپ جۇرگەن وزەكتى ماسەلەنىڭ ءبىرى مەملەكەتتىڭ ستراتەگيالىق مانگە يە نىساندارىنىڭ جاي-كۇيى، قورعالۋى ەدى. بۇل رەتتە سۋ ماسەلەسىنىڭ ءسوز بولۋى مەنىڭ كوڭىلىمە قوندى. اسىرەسە، سۋدى ءتيىمدى، ۇنەمدى پايدالانۋدى ويلاي بەرمەيتىنىمىز جانىما باتادى.
سۋ، تازا اۋا بار تىرشىلىك اتاۋلىنىڭ كوزى. حالقىمىز "سۋلى جەر - نۋلى جەر" دەپ بەكەرگە ايتپاسا كەرەك. سوندىقتان ول مەملەكەتتىڭ قاراۋىندا، قاتاڭ باقىلاۋىندا بولۋى كەرەك. اسىرەسە ترانسشەكارالىق ايماقتاردا داۋلى ماسەلە بولماۋى ءتيىس. تاريحتا سۋعا قاتىستى تالاي مارتە تارتىستى، شيەلەنىستى جاعدايلار ورىن العانىن قاپەردەن شىعارماۋىمىز كەرەك. ارينە بىزدە قۇدايعا شۇكىر مۇنداي ماسەلە بولعان ەمەس. دەيتۇرعانمەن "ساقتانساڭ ساقتايمىن" دەگەن ءپرينسيپتى ۇدايى نازاردا ۇستاعان ءجون. بۇل رەتتە قاسىم-جومارت كەمەل ۇلىنىڭ ارنايى سۋ مينيسترلىگىن قۇرۋعا پارمەن بەرۋى وتە قۇپتارلىق ءىس.
ەگەر ستراتەگيالىق ماڭىزى تۇرعىسىنان الىپ قارايتىن بولساق، تابيعاتتى، قورشاعان ورتانى قورعاۋدان ارتىق قاسيەتتى مىندەت بولا بەرمەيدى. ويتكەنى جۇتقان اۋاڭ، ىشكەن سۋىڭ ادام دەنساۋلىعىن ساقتاۋدىڭ باستى كەپىلى. وسى رەتتە كەيىنگى جىلداردا تابيعاتى كوركەم الماتى سياقتى شاھارلاردىڭ ەكولوگياسى دا سىن كوتەرمەيتىنى جاسىرىن ەمەس. . ءتىپتى قالا ىشىندە ەكولوگيانىڭ قاراپايىم تالاپتارىن دا ەسكەرە بەرمەيتىن كولىكتەردى باقىلايتىن ەكوپوستىلار جۇمىسىن باسەڭدەتىپ العان.سونىمەن قاتار تاۋدان كەلەتىن سالقىن سامالدى تەجەيتىن بيىك عيماراتتار سالۋدى دا بەلگىلى مولشەردە، ءار جەردىڭ تابيعي مۇمكىندىگىن قاتاڭ ەسكەرە وتىرىپ شەكتەگەن ءجون. سوندىقتان ەكولوگيا مينيسترلىگىن دە قايتا قۇرىپ، مارتەبەسىن دە زاڭمەن بەكىتۋ كەزەك كۇتتىرمەيتىن ماسەلە دەپ بىلەمىن.
سونىمەن قاتار اۋىل، اۋدان اكىمدىكتەرىنىڭ جوعارىعا قول جايىپ وتىرماي، بيۋدجەتى دەربەس بولىپ، قاراجاتقا ءوزى قوجالىق ەتۋى دە دۇرىس ويلاستىرىلعان.
اسىرەسە جولداۋدا بالالاردىڭ وقۋىنا، اتا-اناعا ۇلكەن كومەك بولاتىن "كەلەشەك" نەسيەسىنىڭ قولعا الىناتىنى قۋانتتى. جالپى حالىقتىڭ الەۋمەتتىك، تۇرمىستىق جاعدايىن ارتتىرۋدى مەملەكەتتىڭ موينىنا جۇكتەپ قويماي، تابىسى تايقازانداي تاسىعان، ءتيىستى قورلار، كومپانيالار ارقىلى دا جاقسارتۋدىڭ جولىن ىزدەۋ كەرەك. سوندىقتان قوسىمشا قارجى كوزدەرىن تاۋىپ، ەڭ تومەنگى جالاقى مولشەرىن 85 مىڭ تەڭگەدەن جوعارى كوتەرۋگە دە مۇمكىندىگىمىز زور. بۇل رەتتە مەملەكەت باسشىسىنىڭ شەتكە كەتكەن اكتيۆتەردىڭ ەسەلەپ قايتارىلىپ جاتقانىن اتاپ ءوتۋى دە كوپ جايدان ۇمىتتەندىرەدى.
قورىتا ايتقاندا، ءىستىڭ كوزىن تابا ءبىلۋ، ۇيىمداستىرۋ جۇمىستارىن دۇرىس، ۇيلەسىمدى جۇرگىزۋ - جولداۋدا ايتىلعان تالاپتاردى جۇزەگە اسىرۋدىڭ باستى كەپىلى.