ارزانعا ساتىلىپ كەتكەن نىساندار مەملەكەتكە قايتارىلادى

13،5 ملرد تەڭگەگە جۋىق مۇلىكتى مەملەكەتتىك مەنشىككە قايتارۋ ءىسى قارالىپ جاتىر.

ونىڭ ىشىندە الماتىداعى قۇنى 2،9 ميلليارد تەڭگە بولاتىن 3،84 گەكتار جەر ۋچاسكەسى دە بار، دەپ حابارلايدى Almaty-akshamy.kz

ەكونوميكالىق رەسۋرستاردى زاڭسىز شوعىرلاندىرۋعا قارسى ءىس-قيمىل ماسەلەلەرى جونىندەگى ۆەدومستۆوارالىق كوميسسيا وليگوپوليانىڭ مەنشىگىنە بەرىلگەن وبەكتىلەردى ساتىپ الۋ-ساتۋ شارتىن جارامسىز دەپ تانۋ جانە مەملەكەتكە قايتارۋ جۇمىسىن جۇرگىزىپ جاتىر.

كوميسسيانىڭ رەسمي وكىلى زەيىن الىپبەكتىڭ ايتۋىنشا، سوتتا جالپى 13،5 ملرد تەڭگەگە جۋىق مۇلىكتى مەملەكەتتىك مەنشىككە قايتارۋ تۋرالى پروكۋروردىڭ 10 تالابى قارالىپ جاتىر.

ونىڭ ىشىندە استانالىق «شاپاعات» بازارى، شىمكەنتتەگى قوقىستى قايتا وڭدەۋ كاسىپورنى – «تازا قالا» مكك جانە «لتد تۇرمىس» ج ش س، شىمكەنتتەگى «قازاق يننوۆاسيالىق ۋنيۆەرسيتەتى» جشس-عا تيەسىلى، قۇنى 4،5 ملرد تەڭگە بولاتىن 150 گەكتار جەر ۋچاسكەسى؛ «سارىاعاش» ساناتوريي-كۋرورتتىق كەشەنىندەگى 1،44 گەكتار جەر، اقمولا وبلىسىنداعى 17 مىڭ گەكتار جەر ۋچاسكەسى، الماتىداعى قۇنى 2،9 ميلليارد تەڭگە بولاتىن 3،84 گەكتار جەر ۋچاسكەسى، باعالاۋ قۇنى 1،5 ميلليارد تەڭگە بولاتىن «نايزا-بن» ج ش س («بارىس-4» بازارى) جارعىلىق كاپيتالىنىڭ 65% بار.

«بۇدان باسقا، اكتيۆتەردى كەيىننەن شىعارۋ، ەكونوميكالىق رەسۋرستاردى مونوپوليالىق شوعىرلاندىرۋ ماقساتىندا مەملەكەتتىك مۇلىكتى زاڭسىز يەلەنۋ، مىندەتتەمەلەردەن، ونىڭ ىشىندە سالىقتىق مىندەتتەمەلەردەن جالتارۋ فاكتىلەرىن انىقتاۋ تۇرعىسىنان ازاماتتىق ىستەر بويىنشا سوت اكتىلەرىنە تەكسەرۋ ءجۇرىپ جاتىر. ءقازىر 21 ملرد تەڭگەگە وليگوپوليا وكىلدەرىنىڭ پايداسىنا شىعارىلعان سوت شەشىمدەرىن قايتا قاراۋ تۋرالى باس پروكۋراتۋرانىڭ 11 نارازىلىعى جوعارعى سوتتىڭ قاراۋىندا جاتىر»، - دەدى زەيىن الىپبەك.