ارزان باعادا جيھاز جاساتپاق بولعان الماتىلىقتار الاياقتىڭ ارباۋىنا ءتۇسىپ قالدى.
الاتاۋ اۋداندىق پوليسيا باسقارماسىندا وسىعان ۇقساس 10 دەرەك بويىنشا سوتقا دەيىنگى تەرگەۋ امالدارى جۇرگىزىلۋدە، دەپ حابارلايدى Almaty-akshamy.kz Polisia.kz-كە سىلتەمە جاساپ.
«ق ر قك-نىڭ 190-بابى 3-بولىگىندە كوزدەلگەن قىلمىستى جاسادى دەگەن كۇدىككە ىلىنگەن كۇدىكتى ۇستالدى جانە ءوز كىناسىن مويىندادى. ءبىزدىڭ مالىمەتكە سايكەس، 27 جاستاعى الماتى وبلىسىنىڭ تۋماسى ت. ەسىمدى ازامات Instagram جەلىسىندەگى اككاۋنتتار ارقىلى جيھاز جاساۋ تۋرالى حابارلاندىرۋلار جاريالاعان. قاسكوي الەۋەتتى تۇتىنۋشىلاردى قىسقا مەرزىمىمەن جانە قولايلى باعامەن قىزىقتىردى. ازاماتتاردىڭ سەنىمىنە قيانات جاساۋ، الداۋ ارقىلى الدىن الا تولەم العان. ال تۇسكەن قارجىنى ءوزى يەمدەنىپ، ءوز قالاۋى بويىنشا پايدالانعان. ءقازىردىڭ وزىندە 10 الاياقتىق دەرەگى انىقتالدى. ول كليەنتتەردەن ورتاشا ەسەپپەن 300 مىڭ تەڭگەدەن 1،3 ميلليون تەڭگەگە دەيىن العان. كۇدىكتىنىڭ قىلمىستىق ارەكەتىنەن كەلگەن جالپى شىعىن 2،5 ميلليون تەڭگەدەن اسادى»، – دەدى الاتاۋ اۋداندىق پوليسيا باسقارماسىنىڭ باستىعى ءىلياس ومىرسەرىكوۆ.
سونداي-اق، الماتى قالاسىنىڭ پروكۋراتۋراسى الاياقتىق تۋرالى ەسكەرتەدى. الاياقتىقتىڭ قۇربانى بولماۋ ءۇشىن ەشكىمگە دەربەس دەرەكتەردى، بانك كارتالارىنىڭ دەرەكتەمەلەرىن حابارلاماۋدى، اۋدارىمدار تۋرالى تۇبىرتەكتەردى، كودتاردى جانە كودتىق سوزدەردى، ونىڭ ىشىندە بانك جانە قۇقىق قورعاۋ ورگاندارىنىڭ قىزمەتكەرلەرى بولىپ تابىلاتىن تۇلعالارعا بەرمەۋگە كەڭەس بەرەدى.