بۇگىن استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ اپەللياسيالىق القاسى بۇرىنعى مادەنيەت جانە سپورت ءمينيسترى ارىستانبەك مۇحامەديۇلىنا، ونىڭ ايەلى مەن ادۆوكاتىنا قاتىستى ءىس پەن ۇكىمدى قارادى، دەپ حابارلايدى اlmaty-akshamy.kz.
ايتا كەتەيىك، اقپان ايىندا استانا قىلمىستىق ىستەر جونىندەگى مامانداندىرىلعان اۋدانارالىق سوتى قازاقستان ۇلتتىق مۋزەيىنىڭ بۇرىنعى ديرەكتورى، بۇرىنعى مادەنيەت جانە سپورت ەكس-مينيسترى ارىستانبەك مۇحامەديۇلىنا جانە باسقا دا ادامدارعا قاتىستى ۇكىم شىعارعان ەدى.
ارىستانبەك مۇحامەدي ۇلى اسا ءىرى كولەمدە پارا الۋعا ارەكەتتەنگەنى ءۇشىن كىنالى دەپ تانىلدى. وتكەن جازانى ەسكەرە وتىرىپ، بۇرىنعى شەنەۋنىك ءومىر بويىنا مەملەكەتتىك قىزمەتتە قىزمەت اتقارۋعا تىيىم سالىنىپ، 11 جىلعا باس بوستاندىعىنان ايىرىلدى.
بۇگىنگى سوتتا سوتتالعانداردىڭ ادۆوكاتتارى مەن قوعامدىق قورعاۋشىلارى ءسوز سويلەدى.
ارىستانبەك مۇحامەدي ۇلىنىڭ قوعامدىق قورعاۋشىسى ونىڭ ۇلى ديماش مۇحامەدي بولدى.
ديماش ءوزىنىڭ سوتقا دايىندالىپ ۇلگەرمەگەنىن ايتىپ، ءوز ءسوزىن مەملەكەت باسشىسى قاسىم-جومارت توقايەۆقا العىس بىلدىرۋدەن باستادى. پرەزيدەنتكە جاڭا قازاقستاندى ەنگىزگەنى ءۇشىن جانە سوت جۇيەسىنىڭ وبەكتيۆتى، اشىق جانە ءادىل بولۋىنا ەرەكشە نازار اۋدارعانى ءۇشىن ريزاشىلىعىن ءبىلدىردى.
ارىستانبەكتىڭ ۇلى اتا-اناسىنىڭ بالا كەزىنەن ادالدىققا، ادەپتىلىككە ۇيرەتكەنىن دە اتاپ ءوتتى.
ادۆوكاتتى قولداعىم كەلەدى. اكەم ارىستانبەك مۇحامەديۇلىن تولىعىمەن اقتاۋدى سۇرايمىن. سەبەبى بۇل ويدان شىعارىلعان ءىس. مەنىڭ انام عاليا ىسقاقوۆانى تولىعىمەن اقتاساڭىزدار. ەكى جىلدان استام ۋاقىت بويى وتباسىمىزدا قۋانىشتىڭ لەبى سەزىلمەي قالدى، - دەدى ول.
ديماش مۇحامەديدىڭ ايتۋىنشا، اكەسى ەكى جىلدان استام ۋاقىت قاماۋدا بولعاندىقتان، ول ءالى ءوزىنىڭ ءبىرىنشى نەمەرەسىن دە كورمەگەن. سونداي-اق اناسى زاڭسىز التى اي بويى ءۇي قاماۋىندا وتىر.
سوتتا مۇستاحيم تولەيەۆتىڭ ادۆوكاتى كارينا جۇماعازييەۆا دا ءسوز سويلەدى.
تولەيەۆ باسقا سوتتالعاندارمەن زاڭ كومەگىن كورسەتۋ تۋرالى شارت جاساستى. ول ءوز ءىسىن سوڭىنا دەيىن اياقتامادى جانە زاڭ تالاپتارىنا سايكەس العان سىياقىسىن قايتارۋعا مىندەتتى. تولەيەۆ ونى قايتاردى، مۇلىكتىك نەمەسە باسقا سيپاتتاعى شاعىمدار جوق ەكەنى تۋرالى قولحاتتا جازىلعان. ادۆوكات پەن كليەنت اراسىنداعى قاراپايىم ازاماتتىق قاتىناستار قىلمىستىق قۇقىق بۇزۋشىلىق سياقتى كورىنەدى، - دەدى كارينا جۇماعازييەۆا.
مۇستاحيم تولەيەۆتى ونىڭ ۇلى تەمىرلان تولەيەۆ، ارىستانبەك مۇحامەدي ۇلىنىڭ مۇددەسىن ادۆوكات راحىم ماقاجانوۆ، تاعى دا ءبىرقاتار ادۆوكاتتار مەن قوعامدىق قورعاۋشىلار قورعادى.
پروكۋرور ارمان كازيكەن اپەللياسيالىق شاعىمداردا كەلتىرىلگەن دالەلدەر ۇكىمنىڭ كۇشىن جويۋعا نەگىز بولا المايدى دەپ سانايدى. سوت كەڭەسۋ بولمەسىنە كەتتى. شەشىم بۇگىن تۇستەن كەيىن جاريالانادى دەپ كۇتىلۋدە.