زالالدىڭ جالپى سوماسى 96 373 286 573، 37 تەڭگەنى قۇرايدى
ارىس قالاسىنداعى ءوق-دارى قويماسىندا بولعان جارىلىس سالدارىنان كەلگەن شىعىندى 16 ادام وتەيدى. مۇنداي شەشىمدى استانا قالاسىنىڭ ەسىل اۋداندىق سوتى شىعاردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازاقستان رەسپۋبليكاسىنىڭ قورعانىس مينيسترلىگى (بۇدان ءارى - تالاپكەر، مينيسترلىك) 2019 جىلعى 24 ماۋسىمدا ارىس قالاسىندا وق-دارىلەردىڭ جارىلۋى سالدارىنان تۋىنداعان 97 ملرد تەڭگەدەن استام زالالدى 16 جاۋاپكەردەن مەملەكەت كىرىسىنە ءوندىرىپ الۋ تۋرالى تالاپ ارىزبەن سوتقا جۇگىندى. جاۋاپ بەرۋشىلەر - بۇرىنعى اسكەري قىزمەتشىلەر. ولار قىزمەت بارىسىندا ءورت قاۋىپسىزدىگى، وق-دارىلەردى ساقتاۋ، وتكىزۋ جانە كادەگە جاراتۋ، تەحنيكالىق باقىلاۋ ءۇشىن جاۋاپتى بولدى. ءبىر جاۋاپ بەرۋشى كۇزەت-ورت دابىلىن ورناتۋدى جۇزەگە اسىرعان ج ش س باسشىسى سانالادى»، - دەلىنگەن اۋداندىق سوت تاراتقان اقپاراتتا.
تاراتىلعان مالىمەتكە سايكەس، ءوق-دارى جارىلىسىن جاۋاپ بەرۋشىلەردىڭ بارلىعىنىڭ كىناسى شىمكەنت گارنيزونى اسكەري سوتىنىڭ 2019 جىلعى 24 ماۋسىمداعى زاڭدى كۇشىنە ەنگەن ۇكىمىمەن انىقتالعان. وسى ۇكىممەن مينيسترلىككە ازاماتتىق سوت ءىسىن جۇرگىزۋ تارتىبىمەن مۇلىكتىك تالاپتاردى قاناعاتتاندىرۋ قۇقىعى بەرىلگەن. تالاپكەردىڭ تالابى جارىلىس سالدارىنان قازاقستان رەسپۋبليكاسى قارۋلى كۇشتەرىنىڭ، 44859-اسكەري ءبولىمنىڭ، 16752-اسكەري ءبولىمنىڭ، 74884-اسكەري ءبولىمنىڭ تەڭگەرىمىندەگى عيماراتتاردى، قۇرىلىستاردى، ينفراقۇرىلىمدى بۇزۋ، وق-دارىلەردى جويۋ تۇرىندە مەملەكەتكە مۇلىكتىك زالال كەلتىرىلگەندىگىمەن نەگىزدەلگەن. سوت تاعايىنداعان ساراپتامانىڭ قورىتىندىسىنا سايكەس، زالالدىڭ جالپى سوماسى 96 373 286 573، 37 تەڭگەنى قۇرايدى.
«ق ر ازاماتتىق كودەكسىنىڭ 932-بابىندا بىرلەسىپ كەلتىرىلگەن زيان ءۇشىن جاۋاپكەرشىلىك كوزدەلگەن. بىرلەسىپ زيان كەلتىرگەن ادامدار جابىرلەنۋشىنىڭ الدىندا بىرگە جاۋاپ بەرەدى. سوت بەلگىلەنگەن جاعدايلاردى ەسكەرە وتىرىپ، تالاپ قويۋدى قاناعاتتاندىرۋ تۋرالى قورىتىندىعا كەلدى. استانا قالاسى ەسىل اۋداندىق سوتىنىڭ 2022 جىلعى 19 قازانداعى شەشىمىمەن جاۋاپ بەرۋشىلەردەن مەملەكەت كىرىسىنە سوت ساراپتاماسىنا سايكەس، زالال مەن سوت شىعىندارى ىنتىماقتى تارتىپپەن ءوندىرىلدى. سوت شەشىمى زاڭدى كۇشىنە ەنگەن جوق»، - دەپ اتاپ وتەدى سوتتان.