"ارتىنان كەلىپ، تۇنشىقتىرعان". داياشى ءدامحانا قوناعىن تونادى

كۇدىكتى وزبەكستان رەسپۋبليكاسىنىڭ 28 جاستاعى ازاماتى بولىپ شىقتى

استانادا ءدامحانادان شىققان ادامدى داياشى توناپ كەتتى، دەپ حابارلايدى Almaty-akshamy.kz.

استانانىڭ 60 جاستاعى تۇرعىنى الدەكىم وزىنە شابۋىل جاسالىپ، 690 مىڭ تەڭگەسىن ۇرلاپ كەتكەنىن ايتىپ، پوليسيا كومەگىنە جۇگىندى.

كەشكە قاراي ەر ادام قۇدايبەردى ۇلى كوشەسىندەگى شاعىن ءدامحاناعا كىرىپ، تاماقتانعان. قىزمەت كورسەتۋشى داياشى ەر ادامنىڭ قول سومكەسىندە كوپ اقشا بارىن بايقاپ قالعان.

ەر ادام ءدامحانادان شىققاندا داياشى ونىڭ ارتىنان ىلەسە شىققان. ءسويتىپ قۇربانىنىڭ ارتىنان كەلىپ، بىلەگىن موينىنا وراپ، تۇنشىقتىرا باستايدى. سودان كەيىن ەر ادامنىڭ قولىنداعى بارسەتكاسىن جۇلىپ الىپ، قاشا جونەلەدى.

جەدەل-ىزدەستىرۋ ءىس-شارالارى بارىسىندا قاراقشى قاراعاندىدا ۇستالدى. ول وزبەكستان رەسپۋبليكاسىنىڭ 28 جاستاعى ازاماتى بولىپ شىقتى، ول ءوز كىناسىن مويىندادى.

«وسى فاكتى بويىنشا سوتقا دەيىنگى تەرگەۋ امالدارى قولعا الىندى. ۇستالعان ادامنىڭ استانا اۋماعىندا جاسالعان باسقا دا وسىنداي قىلمىستارعا قاتىسى بار-جوقتىعى تەكسەرىلەدى. كۇدىكتى ۇستاۋ يزولياتورىنا قامالدى»، - دەدى ق ر ءىىم باسپا ءسوز قىزمەتى.