انتيكور «Artsport» جوباسىنىڭ جەمقورلىق فاكتىلەرى تۋرالى مالىمەتتەردى جاريالادى.
اگەنتتىكتىڭ 2022 جىلعى سىبايلاس جەمقورلىققا قارسى ءىس-قيمىل تۋرالى ۇلتتىق بايانداماسىندا «Artsport» جوباسى شەڭبەرىندەگى جەمقورلىق ىستەرى جايلى اقپارات بەرىلگەن، دەپ حابارلايدى Almaty-akshamy.kz
«ۇيىرمەلەر مەن سەكسيالاردى مەملەكەتتەن قارجىلاندىرۋ جولىمەن بۇقارالىق بالالار سپورتى مەن شىعارماشىلىعىن دامىتۋعا باعىتتالعان «Artsport» جوباسى شەڭبەرىندە انىقتالعان سىبايلاس جەمقورلىق سحەمالارى قوعامدا ۇلكەن رەزونانس تۋدىردى. جان باسىنا شاققانداعى قارجىلاندىرۋعا شامامەن 43 ملرد تەڭگە ءبولىندى (2021 جىلى – 5،8 ملرد تەڭگە، 2022 جىلى – 37 ملرد تەڭگە). باعدارلاما ىسكە اسىرىلعان قىسقا مەرزىمنىڭ ىشىندە 11 ادامعا قاتىستى 19 قىلمىستىق ءىس تىركەلدى. 6 ادامنىڭ ءىسى سوتقا بەرىلىپ، ونىڭ 4-ەۋى سوتتالدى»، - دەلىنگەن قۇجاتتا.
انتيكور مالىمەتى بويىنشا، سىبايلاس جەمقورلىق تاۋەكەلدەرى باعدارلاماعا بولىنگەن قاراجاتتى يگەرۋدىڭ بارلىق كەزەڭىندە انىقتالعان.
«بيۋدجەتتىڭ مەرزىمىنەن بۇرىن يگەرىلۋىنە بايلانىستى جوبا ەكى رەت توقتاپ قالدى. سونداي-اق «ArtSport» ەلەكتروندىق پلاتفورماسىندا قۇجاتتاردى بەرۋ جانە ساباققا قاتىسۋدى ەسەپكە الۋدى سيفرلاندىرۋدىڭ جەتكىلىكسىزدىگى انىقتالدى. جۇيەنىڭ شالاعايلىعى «ومىردە جوق» جانداردى ەنگىزۋگە مۇمكىندىك بەردى»، - دەپ جازىلعان ۇلتتىق باياندامادا.