ينتەگراسيالاۋ جۇمىستارى جۇرگىزىلىپ جاتىر
بالالار جاتتىعاتىن ورىندارعا قويىلاتىن تالاپتاردى كۇشەيتىپ جاتىرمىز. بۇل تۋرالى بۇگىن مادەنيەت جانە سپورت ءمينيسترى داۋرەن ابايەۆ الماتى وبلىسى تۇرعىندارىنىڭ سۇراقتارىنا جاۋاپ بەرۋ بارىسىندا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قازاقستاندىق بالالار ارتسپورت باعدارلاماسى اياسىندا سپورتپەن جانە شىعارماشىلىقپەن تەگىن اينالىسىپ جاتىر. الداعى ۋاقىتتا كورسەتىلىپ جاتقان قىزمەتتەردىڭ ساپاسىن ارتتىرىپ، بالالارعا قولايلى جاعداي جاساۋ ماقساتىندا كاسىپكەرلەرگە قويىلاتىن تالاپتارعا وزگەرىستەر ەنگىزىلەدى.
قازىرگى ۋاقىتتا باعدارلاما پلاتفورماسىن ۇلتتىق ءبىلىم بەرۋ دەرەكتەر بازاسىمەن (ۇبدب) ينتەگراسيالاۋ جۇمىستارى جۇرگىزىلىپ جاتىر.
«كەيبىر بالالار ۇيىرمەلەر مەن سپورتتىق سەكسيالارعا بارماسا دا، قىزمەت كورسەتۋشىلەردىڭ قۇجاتتارىندا تىركەلىپ تۇرادى، ولار ءوز كەزەگىندە ءار بالا ءۇشىن مەملەكەتتەن اقشا الىپ وتىر. ءارى ساپا ماسەلەسى دە نازاردان تىس قالماۋى كەرەك. بالالار جاتتىعاتىن ورىندارعا قويىلاتىن تالاپتاردى كۇشەيتىپ جاتىرمىز. ول – عيماراتتىڭ سانيتارلىق جاعدايى، ءورت قاۋىپسىزدىگى، بەينەباقىلاۋ كامەرالارى، سپورتتىق جانە باسقا دا قاجەتتى جابدىقتاردىڭ بولۋى. مۇنىڭ بارلىعى بالالاردىڭ ساپالى ءبىلىم الۋى ءۇشىن، قاۋىپسىزدىگى ءۇشىن جاسالادى. سپورت تۇرىنە بايلانىستى جاتتىعۋدى قاي جاستان باستاپ جاساۋعا بولاتىنى دا ناقتىلانادى»، - دەدى داۋرەن ابايەۆ.
ايتا كەتۋ كەرەك، باعدارلاما بويىنشا قىزمەت كورسەتىپ جاتقان كاسىپكەرلەر مەن اتا-انالار مينيسترگە تالاپتاردى كۇشەيتۋگە قاتىستى بىرلەسىپ جۇمىس ىستەۋگە مۇمكىندىك جاساعانى ءۇشىن العىس ءبىلدىرىپ، بالالاردىڭ قولىمەن جاسالعان بۇيىمداردى سىيلىق رەتىندە تابىس ەتتى.
سونداي-اق قونايەۆ قالاسىندا وتكەن حالىقپەن كەزدەسۋ بارىسىندا ەڭبەكاقىنى كوتەرۋ، تۋريزم سالاسىندا كادرلار دايارلاۋ، سپورتتىق رازريادتار بەرۋ جانە ت. ب. ماسەلەلەر تالقىلاندى.