ۇزدىكتەر رەسپۋبليكالىق بايقاۋعا جولداما الادى
الماتى وبلىسىندا جاس قاريلار سايىسى ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
16 جاستاعى مۇحاممەد بالتاباي جاس قاريلار سايىسىنا العاش رەت قاتىسىپ وتىر. كىشكەنتايىنىن قۇران وقىپ، يسلام ىلىمىنە قىزىعۋشىلىق تانىتىپ وسكەن. وعان اتا-اناسى مەن مەشىتتەگى ۇستازداردى سەبەپ بولىپتى. قاسيەتتى كىتاپقا قۇرمەت كورسەتۋ باستى پارىز سانايتىن مۇحاممەدتىڭ ايتۋىنشا، بۇل – اتا-بابامىزدان كەلە جاتقان يگى ءداستۇر.
«قۇرانعا قىزىعۋشىلىعىم 10 جاسىمنان باستالدى. 3 جىلداي وسى جەردە وقىدىم. سوسىن تۋرسياعا وقىدىم. قۇراندى جاتتاعان ادامنىڭ ەكى ومىردە دە دارەجەسى جوعارى بولادى»، – دەدى جارىسقا قاتىسۋشى مۇحاممەد بالتاباي
بۇگىنگى جاس قاريلار سايىسىنا وبلىستىڭ ءار ايماعىنان 12-30 جاس ارالىعىنداعى 65 ۇمىتكەر كەلىپ، ب ا ق سىنادى. قمدب تىكەلەي ۇيىمداستىرۋمەن وتكەن ءىس-شارا بيىل 11-رەت وتكىزىلىپ وتىر. ماقسات – جاستار اراسىندا ءدىني ساۋات اشۋ، ولاردىڭ قۇران كارىمگە ىقىلاسىن ارتتىرۋ.
«وسىنداي جارىسقا كوبىرەك قاتىسسا، قۇراندى، اللانى تانۋعا دەگەن ىقىلاستارى جوعارى دارەجەدە بولادى. ءدىندى جاقسى كورەتىن بولادى. ءدىندى جاقسى كورسە، يماندى ۇرپاقتارىمىز كوپ بولسا، ەلىمىزدە قاي سالا بولماسىن ءمۇعالىم بولسىن، دارىگەر بولسىن ول ادال قىزمەت ەتەتىن بولادى»، – دەدى قمدب-نىڭ نايب ءمۋفتيى كەنجەالى قاجى قوڭىراتباي ۇلى.
بايقاۋ قاتىسۋشىلارىنىڭ تالابىن ەلىمىزگە تانىمال قاريلار بايقاپ كوردى. ءادىل-قازىلار قۇران كارىمنىڭ كەز-كەلگەن جەرىنەن ءۇزىندى وقيدى. ال قاتىسۋشى بولسا، قاتەلەسپەي ارى قاراي جالعاستىرىپ اكەتۋى كەرەك. وبلىستىق باس يمامنىڭ ايتۋىنشا، ۇمىتكەرلەردىڭ سانى جىل ساناپ ارتىپ كەلەدى.
«پايعامبارىمىز (س.ع.س) حاديسىندە «سەندەردىڭ ەڭ جاقسىلارىڭ قۇراندى ۇيرەنىپ، ونى وزگەلەرگە ۇيرەتكەندەرىڭ» دەيدى. مىنە سوندىقتان قاسيەتتى قۇرانىمىزدى شاكىرتتەرىمىز جاتتاپ، وسىنداي دەڭگەيگە جەتىپ، مەشىتتەرىمىزدە، وبلىس ورتالىقتارىندا جارىستار ءوتىپ تۇرادى»، – دەدى الماتى وبلىسىنىڭ باس يمامى ماديار ءپىرىمقۇلوۆ.
قۇران كارىمدى مانەرلەپ جانە جاتقا وقۋ سايىسى ءقازىر ەلىمىزدىڭ ءار وڭىرىندە ءوتىپ جاتىر. ءتۇرلى ايماقتان ۇزدىك شىققاندار رەسپۋبليكالىق بايقاۋعا جولداما الادى. ول قىركۇيەك ايىندا وتەدى دەپ جوسپارلانىپ وتىر. ال رەسپۋبليكالىق بايقاۋدىڭ جۇلدەگەرى حالىقارالىق قۇران جارىسىنا قاتىسىپ، ەلىمىزدىڭ نامىسىن الەمدىك دەڭگەيدە قورعايتىن بولادى.