بيدجۋ ناير مەن دجەلسون باتيستانىڭ ورنىنا جاڭا باسشىلار كەلدى
«ارسەلورميتتال تەمىرتاۋ» اق باسپا ءسوز قىزمەتى كومپانيا باسشىلىعىندا ۋاقىتشا وزگەرىستەر ورىن العانى تۋرالى حابارلادى. بۇل اۋىس-تۇيىسكە لەنين اتىنداعى شاحتاداعى 3 قاراشادا بولعان اپاتتى تەكسەرۋ جونىندەگى مەملەكەتتىك كوميسسيانىڭ بايانداماسى تۇرتكى بولعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
ەسكە سالا كەتەيىك، جۇرگىزىلگەن تەكسەرىستەن سوڭ ۇكىمەتتىك كوميسسيا اپاتتىڭ ورىن الۋىنا شاحتانىڭ 26 قىزمەتكەرى جاۋاپتى دەپ قورىتىندى شىعارعان بولاتىن. ولاردىڭ قاتارىندا كومپانيا باسشىلىعى قاتارىنداعى ەكى شەت ەلدىك ازامات بار ەكەنى مالىمدەلگەن بولاتىن.
الايدا ول ازاماتتاردى ونەركاسىپ الىبىنىڭ جەتەكشىلەرى باسقا قىزمەتكە اۋىستىرعان.
«بيدجۋ ناير مەن دجەلسون باتيستا ارسەلورميتتال ۆيسە-پرەزيدەنتى جانە ارسەلورميتتال تمد باس ديرەكتورى ۆيدجاي گويالدىڭ كەڭەسشىلەرى بولىپ تاعايىندالدى، بۇل دەرەۋ كۇشىنە ەنەدى. بۇل ولارعا اعىمداعى جاعدايعا جانە 3 قاراشادا لەنين اتىنداعى شاحتادا بولعان اپاتتىڭ سەبەپتەرىن تەرگەۋگە تولىق نازار اۋدارۋعا مۇمكىندىك بەرەدى»، - دەلىنگەن كومپانيا حابارلاماسىندا.
بيدجۋ ناير مەن دجەلسون باتيستانىڭ ورنىنا جاڭا باسشىلار كەلدى.
وسىلايشا، ۆلاديمير يابلونسكيي مىرزا «ارسەلورميتتال تەمىرتاۋ» اق باس ديرەكتورىنىڭ مىندەتىن اتقارۋشى بولىپ، ۆيكتور گافيۋلوۆ مىرزا «ارسەلورميتتال تەمىرتاۋ» اق تاۋ-كەن ءىسى دەپارتامەنتى باس ديرەكتورىنىڭ مىندەتىن اتقارۋشى بولىپ تاعايىندالدى.
كومپانيا باسپا ءسوز قىزمەتىنىڭ مالىمدەۋىنشە، جاڭا باسشىلاردىڭ وسى سالاداعى ءبىلىمى مەن تاجىريبەسى زور.
ۆيكتور ۆيكتوروۆيچ گافيۋلوۆتىڭ تاۋ-كەن ونەركاسىبىندە 20 جىلدان استام تاجىريبەسى بار. ەڭبەك جولىن 2000 جىلى بالاكلاۆا تاۋ-كەن باسقارماسىندا باستاپ، ماركشەيدەردەن وندىرىستىك ديرەكتورعا دەيىن مانساپ ساتىسىنان وتكەن. تاجىريبەلى، جوعارى بىلىكتى مامان رەتىندە گافيۋلوۆ «ارسەلورميتتال تەمىرتاۋ» كومپانياسىنا جۇمىسقا شاقىرىلعان. 2014 جىلدان باستاپ ول «كەنتوبە» قيماسىندا، «ارسەلورميتتال تەمىرتاۋ» اق كەنىشىنىڭ «اتانسور» «وركەن» ج ش س ديرەكتورى بولىپ جۇمىس ىستەدى. 2017 جىلدان بەرى «وركەن» تاۋ-كەن كاسىپورنىنىڭ باسشىسى. ءبىلىمى بويىنشا تاۋ-كەن ينجەنەرى.
ۆلاديمير يۆانوۆيچ يابلونسكيي باس ديرەكتوردىڭ مىندەتىن اتقارۋشى رەتىندە ءوزىنىڭ مەتاللۋرگيا سالاسىنداعى 33 جىلدىق تاجىريبەسىنە سۇيەنەدى. ۆلاديمير يابلونسكيي قاراعاندى مەتاللۋرگيالىق ينستيتۋتىن بىتىرگەننەن كەيىن 1989 جىلى قاراعاندى مەتاللۋرگيالىق زاۋىتىندا (قازىرگى «ارسەلورميتتال تەمىرتاۋ») كاسىبي قىزمەتىن باستادى. ءشومىششى قىزمەتىنەن «ارسەلورميتتال تەمىرتاۋ» كومپانياسىنىڭ وندىرىستىك ديرەكتورىنا دەيىن كوتەرىلگەن. وسى جىلدار ارالىعىندا كونۆەرتەر سەحىن باسقاردى، بولات ءوندىرىسىنىڭ ديرەكتورى، ءبىرىنشى قايتا ءبولۋدىڭ ديرەكتورى بولدى. بۇل قىزمەتكە تاعايىندالعانعا دەيىن ول «ارسەلورميتتال تەمىرتاۋ» اق بولات دەپارتامەنتىنىڭ وندىرىستىك ديرەكتورى بولىپ جۇمىس ىستەدى جانە 2022 جىلدىڭ مامىرىندا «ارسەلورميتتال» كومپانيالار توبىنىڭ باس مەنەدجەرى دەڭگەيىنە كوتەرىلدى.