قاراعاندى وبلىسىنىڭ اكىمى جۋرناليستەرگە "ارسەلورميتتال تەمىرتاۋ" شاحتاسىنداعى جاعداي تۋرالى ايتتى
قاراعاندى وبلىسىنىڭ اكىمى ەرماعانبەت بولەكپايەۆ جۋرناليستەرمەن كەزدەسىپ، "ارسەلورميتتال تەمىرتاۋ" كومپانياسىنىڭ شاحتالارىنداعى جاعداي جانە قازا تاپقان كەنشىلەردىڭ وتباسىلارىنا كورسەتىلگەن ماتەريالدىق كومەك تۋرالى ايتىپ بەردى، دەپ حابارلايدى almaty-akshamy.kz
ايماق باسشىسىنىڭ ايتۋىنشا، بۇگىنگى تاڭدا كومپانيانىڭ ءتورت شاحتاسى تولىق جۇمىس ىستەۋدە. "قازاقستاندا" ءورت سالدارىن جويۋ جالعاسۋدا، كوستەنكو اتىنداعى شاحتادا اپاتتى تەرگەۋ ءجۇرىپ جاتىر.
– مامانداردىڭ باعالاۋى بويىنشا كوستەنكوداعى جۇمىستى تولىق قالپىنا كەلتىرۋ ءۇشىن تاعى 2–2،5 اي قاجەت بولادى. شاحتالاردى جابۋ تۋرالى اڭگىمە بولعان جوق. ولار جۇمىس ىستەيدى، – دەپ سەندىردى ەرماعانبەت بولەكپايەۆ. – سونداي-اق كەنشىلەر مەن مەتاللۋرگتەردىڭ جالاقىسىن تومەندەتۋگە قاتىستى وزگەرىستەر بولمايدى جانە قىسقارتۋلار دا بولمايدى. ۇجىمدىق شارتقا سايكەس بارلىق مىندەتتەمەلەر ورىندالاتىن بولادى.
قازا تاپقان كەنشىلەردىڭ وتباسىلارى بارلىق قاجەتتى كومەكتى الادى، دەپ تولىقتىردى اكىم. بۇگىنگى تاڭدا 46 وتباسى بجزق-دان جەرلەۋگە ءبىرجولعى تولەم قۇجاتتارىن رەسىمدەدى، 42ء-سى تولەندى، قالعاندارىنا تولەمدەر جالعاسۋدا. رەسپۋبليكالىق بيۋدجەتتەن 23 جاسقا دەيىنگى جوو-دا وقيتىن كامەلەتكە تولماعان بالالارى بار 20 وتباسىنا اسىراۋشىسىنان ايرىلۋ جاعدايى بويىنشا مەملەكەتتىك الەۋمەتتىك جاردەماقى تاعايىندالدى
– "ارسەلورميتتال تەمىرتاۋ" كومپانياسى تاراپىنان 41 وتباسىنا 10 جىلدىق جالاقى تولەندى. قازا تاپقان كەنشىلەردىڭ، ولاردىڭ جۇبايلارىنىڭ، اتا-انالارىنىڭ، بالالارىنىڭ نەسيەلەرى وتەلدى، – دەپ اتاپ ءوتتى ءوڭىر باسشىسى. – سونداي-اق، كومپانيا ءاربىر وتباسى مۇشەسىنە كەمىندە 18 شارشى مەتر پايدالى الاڭ ەسەبى بويىنشا پاتەر ساتىپ الۋعا مىندەتتەنەدى. ساقتاندىرۋ تولەمدەرى، جوعارى وقۋ ورىندارىنداعى بالالاردىڭ 23 جاسقا دەيىن وقۋ اقىسىن وتەۋ قاراشا ايىنان باستاپ تۇسە باستايدى.
وبلىس اكىمى "ارسەلورميتتال تەمىرتاۋ" قازا تاپقانداردىڭ وتباسىلارى الدىنداعى بارلىق مىندەتتەمەلەردى ورىندايتىنىن اتاپ ءوتتى.
مەديسينالىق مەكەمەلەردە ءالى دە زارداپ شەككەن 10 كەنشى جاتىر. ولار دارىگەرلەردىڭ باقىلاۋىندا، جاعدايلارى ورتاشا جانە جەڭىل دەڭگەيدە دەپ باعالانادى.
سونداي-اق، جىلىتۋ ماۋسىمىنىڭ تەمىرتاۋدا ءوتۋى ەرەكشە باقىلاۋدا. وبلىستا ۋاقتىلى ارەكەت ەتۋ ءۇشىن بارلىق جىلۋ كوزدەرىنىڭ جۇمىسىن باقىلايتىن جەدەل شتاب قۇرىلدى.
– "ارسەلورميتتال تەمىرتاۋ" جەو-2 ءبىزدىڭ تالابىمىز بويىنشا دايىندىق پاسپورتىن العان جوق. ولار 4ء-شى جانە 5ء-شى قازاندىقتاردى جوندەۋدى ۇزاققا سوزىپ الدى. ءبىز اپتا سايىن سول جەرگە بارامىز جانە ەنەرگيانى باقىلاۋ ورگاندارىمەن بىرگە جاعدايدى باقىلاپ وتىرمىز. بۇگىنگى تاڭدا ستانسيا شتاتتىق رەجيمدە جۇمىس ىستەيدى، – دەدى ايماق باسشىسى. – كومىر قورى جەتكىلىكتى – 20 كۇننەن استام ۋاقىتقا ەسەپتەلگەن. جەلتوقسان ايىندا وسى ەكى قازاندىقتىڭ جوندەۋ جۇمىستارى اياقتالۋى ءتيىس.
سونىمەن قاتار، ەرماعانبەت بولەكپايەۆ ءوڭىردىڭ الەۋمەتتىك-ەكونوميكالىق دامۋ جوسپارلارىنا توقتالدى. وبلىس اكىمىنە ءوڭىردىڭ ءتۇرلى سالالارىنا قاتىستى 40-قا جۋىق سۇراق كەلىپ ءتۇستى.