بۇل تۋرالى قازاقستان رەسپۋبليكاسىنىڭ توتەنشە جاعدايلار ءمينيسترى گەنەرال-مايور سىرىم ءشارىپحانوۆ الماتى قالاسىنىڭ وڭىرلىك كوممۋنيكاسيالار قىزمەتىنىڭ بريفينگىندە حابارلادى. بۇگىن مينيستر بەيسەنبى كۇنى الماتىنىڭ ورتالىعىندا بولعان ءورت ورنىندا بولدى، دەپ حابارلايدى almaty-akshamy.kz
تج ءمينيسترى سىرىم ءشارىپحانوۆ ءورتتىڭ نەگىزگى سەبەپتەرى مەن ءمان-جايىن تەرگەۋ بويىنشا ارنايى كوميسسيا قۇرىلعانىن ايتتى. كوميسسيا قۇرامىنا تج جانە دەنساۋلىق ساقتاۋ مينيسترلىكتەرىنىڭ، قۇقىق قورعاۋ ورگاندارىنىڭ، الماتى قالاسى اكىمدىگىنىڭ وكىلدەرى جانە باسقا دا مۇددەلى بولىمشەلەر كىردى.
بۇعان دەيىن حابارلانعانداي، مەملەكەتتىك ورتكە قارسى قىزمەت بولىمشەلەرى قۇرامىندا 46 ءورت ءسوندىرۋشى قۇتقارۋشى مەن 13 تەحنيكا جەتى مينۋت ىشىندە وقيعا ورنىنا شۇعىل جەتتى. ءورت قىسقا ۋاقىت ىشىندە ءسوندىرىلىپ، وقشاۋلاندى.
"جۇمىس قيىنداي ءتۇستى: تار جولدار، تىنىس الا المايتىن ورتا، قالىڭ ءتۇتىن. مۇنىڭ ءبارى ءورتتى ءسوندىرۋ، بارلاۋ جۇرگىزۋ جانە ءۇي-جايلارداعى ادامداردى جىلدام ىزدەۋ پروسەسىن قيىنداتتى. جەرتولەدە جينالىپ تۇرعان كوپ ورتوپەديالىق ماتراس ءورت جاعدايىن قيىنداتتى. جەرتولەدە بولعانداردىڭ ورتتەن قاشۋ مۇمكىندىگى وتە از بولدى. سونىمەن قاتار، بۇل ماتراستار ورتەنىپ، جانىپ، قالىڭ ءتۇتىن باستى "، - دەدى مينيستر.
تج ءمينيسترى اتاپ وتكەندەي، بۇل عيمارات ءبىر جارىم اي بۇرىن حوستەلگە زاڭسىز اينالدى. سونداي-اق، حوستەلگە اينالدىرىلعان بولمەلەر سانيتارلىق جانە قۇرىلىس نورمالارىنا ساي بولمادى.
سونىمەن قاتار، قالا اكىمدىگى ءورت كەزىندە زارداپ شەككەندەرگە كومەك كورسەتتى. باسپاناسىز قالعاندار كورشى جاتاقحانالارعا ورنالاستىرىلدى. ءبىرقاتار زارداپ شەككەندەر اۋرۋحاناعا جاتقىزىلدى جانە ولارعا مەديسينالىق مەكەمەلەردە ءتيىستى كومەك كورسەتىلەدى.
"سونداي-اق، وسى جاتاقحانادا ورنالاسقان ستۋدەنتتەر باسپاناعا مۇقتاج ەكەندىكتەرىن مالىمدەمەگەنىن جانە وقۋ ورنى مەن اكىمدىككە باسپاناعا مۇقتاج ەكەندىكتەرىن جانە وسى جاتاقحانادا ورنالاساتىندىعىنان حاباردار ەتپەگەنىن اتاپ وتكىم كەلەدى. ياعني، بۇل جاتاقحانانىڭ بار ەكەندىگى تۋرالى اكىمدىكتە، باسقا ورگانداردا، سونىڭ ىشىندە تجد-دا اقپارات بولعان جوق. سونداي - اق، تجد مەن باسقا دا مەملەكەتتىك ورگانداردىڭ شاعىن بيزنەس سۋبەكتىلەرىن تەكسەرۋ ءىس-شارالارىن جۇرگىزۋگە قۇقىعى جوق ەكەنىن اتاپ وتكىم كەلەدى"، - دەپ تولىقتىردى س.ءشارىپحانوۆ.
سوڭىندا مينيستر ارنايى كوميسسيا ءورتتىڭ شىعۋ سەبەپتەرىن تەكسەرۋگە، بولعان ءورت ءۇشىن كىنالى جانە جاۋاپتى لاۋازىمدى تۇلعالاردى انىقتاۋعا كىرىسكەنىن اتاپ ءوتتى. بۇل وقيعاعا كىنالىلەر جاۋاپقا تارتىلادى.