كوميسسيا مۇشەلەرى مەكتەپكە دەيىنگى ۇيىمدارداعى جاعداي مەن بالاباقشا قىزمەتكەرلەرى جۇمىسىنىڭ ساپا ستاندارتتارىنا سايكەستىگىن تەكسەرەدى.
بالاباقشالار 100% ءقاۋىپسىز بولۋ كەرەك. وسى كۇندەرى الماتىداعى ەكى مەكتەپكە دەيىنگى ۇيىمدا ورىن العان وقيعالارعا جول بەرۋگە بولمايدى. بالاباقشالار اكىمدىكتەردىڭ قاراماعىندا. سونىمەن قاتار زاڭ بۇزۋشىلىقتاردىڭ باسىم كوپشىلىگى جەكەمەنشىك بالاباقشالاردا تىركەلەدى. ءبىراق قاۋىپسىزدىكتى مەنشىك نىسانى مەن باعىنىستىلىعىنا قاراماستان قامتاماسىز ەتۋ قاجەت. وكىنىشكە وراي، وسى جىلدىڭ قىركۇيەگىنە دەيىن مەكتەپكە دەيىنگى ۇيىمداردىڭ ساپاسىن مەملەكەتتىك باقىلاۋ تەتىكتەرى مۇلدەم بولعان ەمەس. بالاباقشالار باسقا ءبىلىم بەرۋ ۇيىمدارىنا قاراعاندا، ليسەنزيالاۋدان بوساتىلىپ، حابارلاما ارقىلى اشىلدى. سونىمەن قاتار بۇرىن مەملەكەتتىك باقىلاۋ مەن اتتەستاتتاۋدان بوساتىلدى. تەك وسى جىلى عانا ءبىز بالاباقشالارعا مەملەكەتتىك تەكسەرۋ ينستيتۋتىن زاڭدى تۇردە ەنگىزە الدىق. وسىعان بايلانىستى كوپتەگەن نارازىلىقتار بولدى. ءبىراق بالالاردىڭ ماسەلەسىنە كەلگەندە، بەيجاي قاراماۋ كەرەك. العاشقى ناتيجەلەر مۇنداي تەكسەرۋلەردىڭ قاجەتتىلىگىن كورسەتتى. جەلتوقسان ايىنىڭ باسىندا ءبىز تەكسەرگەن بالاباقشالاردىڭ شامامەن 80%-ى ءبىلىم بەرۋ قىزمەتىنە قويىلاتىن تالاپتارعا سايكەس كەلمەۋىنە بايلانىستى مەملەكەتتىك اتتەستاتتاۋدان وتپەگەنىن حابارلادىق. سوندىقتان ءبىز باقىلاۋ قۇرالىن ەنگىزدىك.
ءبىز سونداي-اق مەملەكەتتىك تاپسىرىستى جەكە مەنشىك بالاباقشالاردا ورنالاستىرۋعا، تاربيەشىلەردىڭ بىلىكتىلىگىنە جانە قاۋىپسىزدىك ماسەلەلەرىنە قويىلاتىن تالاپتاردى كۇشەيتەمىز. سونىمەن قاتار مەكتەپتەر مەن بالاباقشالاردا پەداگوگيكالىق جۇمىسقا العاش كىرەتىندەردىڭ بىلىكتىلىگىن تاۋەلسىز تەكسەرۋ تۋرالى تالاپ ەنگىزىلەدى.
بالاباقشالار زاڭدى اكىمدىكتەردىڭ قاراۋىندا ەكەنىن ەسكەرە وتىرىپ، ءبىز مەكتەپكە دەيىنگى ۇيىمداردىڭ جۇمىسىن ەرەكشە باقىلاۋعا الۋ قاجەتتىگىن بىرنەشە رەت اتاپ وتتىك. ءار توپقا بەينەكامەرالار بەرىلۋى كەرەك. بالالارمەن جۇمىس ىستەيتىن كادرلاردى ىرىكتەۋ ماسەلەسى دە وتە ماڭىزدى، – دەپ اتاپ ءوتتى ءبىلىم جانە عىلىم سالاسىندا ساپانى قامتامسىز ەتۋ كوميتەتىنىڭ ءتورايىمى گۇلزات كوبەنوۆا.