27 جاسقا تولعان اسكەري بورىشىن وتەمەگەن ادامعا اسكەري بيلەت بەرىلمەيدى. بۇل تۋرالى قورعانىس ءمينيسترىنىڭ ورىنباسارى، گەنەرال-لەيتەنانت سۇلتان كامالەتدينوۆ ايتتى، دەپ حابارلايدى اlmaty-akshamy.kz.
«ارمياعا سيفرلىق تەحنولوگيانى ەنگىزۋ جالعاسىپ جاتىر. اسكەري مىندەتتىنى، اسكەرگە شاقىرىلۋشىنى ەسەپكە الۋ سيفرلىق فورماتقا اۋىستىرىلدى. بۇل جەرگىلىكتى اسكەري باسقارۋ ورگانىنىڭ جۇمىسىن اۆتوماتتاندىرۋعا مۇمكىندىك بەردى. بيىل ءبىز اۋە قورعانىسى كۇشتەرى ءۇشىن اقپاراتتىق جۇيەنى قابىلدادىق. بۇل ەلىمىزدىڭ اۋە كەڭىستىگىن پايدالانۋدا اقپارات اعىمىن اۆتوماتتى رەجيمدە وڭدەۋدى ارتتىردى. اۋە شەبىن قورعاۋدا شەشىم قابىلداۋ ۋاقىتىن بىرنەشە ەسە قىسقارتۋعا مۇمكىندىك بەردى»، - دەدى قورعانىس ءمينيسترىنىڭ ورىنباسارى ورتالىق كوممۋنيكاسيالار قىزمەتىندەگى بريفينگتە.
ونىڭ اتاپ وتۋىنشە، حالىقپەن ءوزارا ءىس-قيمىل ماسەلەسىنە باسا نازار اۋدارىلىپ وتىر.
«قىزمەت وتكەرمەگەن، ونىڭ ىشىندە 27 جاسقا تولعان ادامعا ەندى اسكەري بيلەت بەرىلمەيدى. ونىڭ ورنىنا اسكەري مىندەتتىلىك مارتەبەسى ونىڭ Egov جەكە كابينەتىندە كورسەتىلەدى. جۇمىسقا ورنالاسۋ كەزىندە اسكەري قىزمەتكە قاتىسى تۋرالى انىقتاما الۋ قاجەت ەمەس. جۇمىس بەرۋشى بۇل اقپاراتتى Egov-تان كورە الادى. سيفرلىق ترانسفورماسيا اياسىندا ءبىرقاتار قىزمەتتى اۆتوماتتى تۇردە جۇزەگە اسىرۋ مۇمكىن بولدى. سونىمەن قاتار، 17 جاستاعى ازاماتقا جەكە ءىستى جيناقتاۋ پروسەسى تولىعىمەن اۆتوماتتاندىرىلدى. سيفرلاندىرۋ بويىنشا بارلىق باستاما جۇيەلى تۇردە ىسكە اسادى»، - دەدى سۇلتان كامالەتدينوۆ.