قورعانىس ءمينيسترى اۆياسيا گەنەرال-لەيتەنانتى داۋرەن قوسانوۆتىڭ بۇيرىعىمەن ۇيىمداستىرىلعان ءبىرىڭعاي اشىق ەسىك كۇنى اياسىندا ساربازداردىڭ 4000-نان استام تۋعان-تۋىسى اسكەري بولىمدەرگە جينالدى.
قوناقتارعا قارۋ-جاراق پەن اسكەري تەحنيكا كورمەلەرى ۇيىمداستىرىلدى. اتا-انالار ۇلدارىنىڭ قىزمەت بارىسىندا نەنى مەڭگەرگەنىن ءوز كوزدەرىمەن كوردى. ساپ جانە وقۋ-جاتتىعۋ الاڭدارىندا ساربازدار قارۋمەن ساپتىق تاسىلدەردى، قويان-قولتىق ۇرىس ەلەمەنتتەرىن جانە وقۋ-جاۋىنگەرلىك تاپسىرمالاردى ورىنداۋ شەبەرلىگىن كورسەتتى.
كەلۋشىلەرگە تاربيە جۇمىسىن ۇيىمداستىرۋ جانە اسكەري ءتارتىپتى ساقتاۋ بويىنشا قورعانىس ۆەدومستۆوسى تاراپىنان قابىلدانىپ جاتقان شارالار تۋرالى جان-جاقتى اقپارات بەرىلدى. سونىمەن قاتار قارۋدى قولدانۋ، ساباقتار مەن جاتتىعۋلار وتكىزۋ كەزىندەگى قاۋىپسىزدىك قالاي قامتاماسىز ەتىلەتىنى ەگجەي-تەگجەيلى ءتۇسىندىرىلدى.
قورعانىس ۆەدومستۆوسىنىڭ بۇل باستاماسى مەرزىمدى اسكەري قىزمەتشىلەردىڭ تۋعان-تۋىستارىنا جاۋىنگەرلىك دايىندىقتىڭ ۇيىمداستىرىلۋىمەن، قىزمەت جانە تۇرمىس جاعدايلارىمەن تانىسۋعا مۇمكىندىك بەردى. قوناقتار كازارمالاردى ارالاپ، جاتىن بولمەلەر مەن تۇرمىستىق ايماقتاردى كوردى.
اسحانالاردا ولار ساربازداردى تاماقتاندىرۋ قالاي ۇيىمداستىرىلعانىن كورىپ، تاعام راسيونىنىڭ ءتارتىبى مەن الۋان تۇرلىلىگىن باعالادى. ءىس-شارانىڭ ماڭىزدى ساتتەرىنىڭ ءبىرى – بىرلەسكەن تۇسكى اس بولدى. قاراپايىم وتسە دە، ماعىناسى ايرىقشا بۇل كەزدەسۋ اتا-انالارعا ەرەكشە اسەر ەتتى. كەشە عانا ءجاسوسپىرىم بولعان ۇلدارى سەنىمدى، ءتارتىپتى، بىر-بىرىنە قولداۋ كورسەتۋگە دايىن ناعىز ەر-ازاماتتارعا اينالعان.
اسكەري بولىمدەرگە كەلگەن جاس قوناقتاردى دا ەرەكشە اتاپ وتكەن ءجون. ولار سارباز قىزمەتىندەگى اعالارىنا سۇيسىنە قارايدى. تاراز قالاسىنان كەلگەن ون جاستاعى الەنا «وڭتۇستىك» وڭىرلىك قولباسشىلىعىنا قاراستى بايلانىس پولكىندە قىزمەت ەتەتىن اعاسى ۆلاديمير رومانوۆتا قوناقتا بولدى. اسكەري بولىمگە جاسالعان بۇل ساپار مەكتەپ وقۋشىسىنا وشپەس اسەر قالدىرىپ، اعاسىنا دەگەن ماقتانىش سەزىمىن وياتقانى ءسوزسىز.
گۆاردەيسك گارنيزونىنداعى تانك بريگاداسىنىڭ بارلاۋ باتالونىندا قىزمەت ەتەتىن ايبار كاليفانوۆتىڭ ءۇش جاسار ءىنىسى امىرە اعاسىنىڭ قولىنان تۇسكەن جوق. ۇرپاقتان ۇرپاققا جالعاساتىن اسكەري ءداستۇر ءدال وسىلاي قالىپتاسادى.
ەلورداداعى بريگاداداعا قاراعاندى، شىمكەنت، قىزىلوردا، قوستاناي جانە استانا قالالارىنان بارلىعى 170-تەن استام اتا-انا جينالدى. ولار ءتيردى، سپورت زالىن، كىتاپحانانى ارالاپ، جاۋىنگەرلەر جاتتىعاتىن تاكتيكالىق الاڭدا بولدى.
قاتارداعى جاۋىنگەر دياس بازكەنوۆتىڭ اكەسى اسحات پەن ونىڭ تۋعان اعاسى ءسابيت بازكەنوۆ قاراعاندى قالاسىنان ارنايى كەلگەن. جاۋىنگەرلىك جارىستىڭ جەڭىمپازى اتانعان دياس بازكەنوۆتىڭ سۋرەتى بولىمشەنىڭ قۇرمەت تاقتاسىنا ىلىنگەن.
ءسابيت بازكەنوۆتىڭ ءوزى كەزىندە تاجىك-اۋعان شەكاراسىندا اسكەري بورىشىن وتەگەن. ول قازىرگى اسكەردىڭ جاعدايىن كورىپ، ەرەكشە اسەر العانىن ايتتى.
– مەن ءوزىم تاجىك-اۋعان شەكاراسىندا قىزمەت اتقاردىم. ول كەزدىڭ قيىندىعى از بولعان جوق. بۇگىنگى جاستاردىڭ اسكەري بورىشىن ابىرويمەن وتەپ جۇرگەنىن كورىپ، كوڭىلىم مارقايدى. دياس سياقتى ءتارتىپتى، نامىستى ۇلدار ەلدىڭ قورعانى بولارى ءسوزسىز. جاستارعا ايتارىم – وتان الدىنداعى بورىشتى ادال اتقارىپ، اسكەري تارتىپكە ءاردايىم بەرىك بولسىن، – دەدى ول.
سونداي-اق ءسابيت بازكەنوۆ اسكەري ءبولىم باسشىلىعىنا دا ريزاشىلىعىن ءبىلدىردى.
– بالامىزدىڭ قىزمەت ەتۋ جاعدايىن ءوز كوزىمىزبەن كوردىك. بارلىق قاجەتتى جاعداي جاسالعان، ءتارتىپ پەن تالاپ بار. اسكەري ءبولىم قولباسشىلىعىنا العىسىمدى ايتامىن، – دەپ تۇيىندەدى ول.
ال اقتاۋ گارنيزونىنىڭ اسكەري بولىمدەرى 400-دەن استام قوناقتى قابىلدادى. اسكەري-تەڭىز كۇشتەرىنىڭ ارتەكتى كەمەلەر ديۆيزيونىندا اتا-انالار تەڭىز قىزمەتىنىڭ اتموسفەراسىنا قانىقتى. ولار ماتروستاردىڭ تۇرمىسىمەن تانىسىپ، كايۋت-كومپانيالار مەن كامبۋزدى ارالادى.
تەڭىز جاياۋ اسكەرلەرى بريگاداسىندا اتا-انالاردىڭ قاتىسۋىمەن سپورتتىق جارىستار ءوتتى. ماڭعىستاۋ وبلىسى مەن اقتاۋ قالاسى بويىنشا «انالار جۇرەگى» سارباز انالارى كوميتەتىنىڭ ءتورايىمى گۇلميرا جانىسبايەۆا جارىستىڭ باستاماشىسى بولدى.
دەسانتتىق-شابۋىلداۋ اسكەرلەرىنىڭ بولىمشەلەرى دە 400-دەن استام قوناقتى قارسى الدى. 37-دەسانتتىق-شابۋىلداۋ بريگاداسىندا قوناقتارعا ءپاراشيۋتتى قالاي كيۋ كەرەكتىگى كورسەتىلىپ، ارنايى كەشەندە اۋە-دەسانتتىق دايىندىق ەلەمەنتتەرى تانىستىرىلدى.
ءىس-شاراعا قاتىسا الماعان اتا-انالار مەن جاقىندارى ءۇشىن اسكەري بولىمدەردىڭ باسشىلىعى «وتباسىمەن بەينەقوڭىراۋ» سەرۆيسى ارقىلى بايلانىس ۇيىمداستىردى. وسىلايشا، 26363 اسكەري ءبولىمى كومانديرىنىڭ تاربيە جانە يدەولوگيالىق جۇمىس جونىندەگى ورىنباسارى كاپيتان ماديار مۇحتاروۆ قاتارداعى جاۋىنگەر بەگمات مىرزابەكتىڭ اناسى دۇيسەگۇل اقجىگىتوۆامەن بەينەبايلانىسقا شىقتى.
اڭگىم بارىسىندا اناسىنا ساربازدىڭ قىزمەتتەگى جەتىستىكتەرى تۋرالى جان-جاقتى اقپارات بەرىلدى. اتاپ ايتقاندا، دەسانتتىق-شابۋىلداۋ اسكەرلەرى اسكەري قىزمەتشىلەرى اراسىندا وتكەن قازاقشا كۇرەس جارىسىندا بەگمات مىرزابەك ءۇشىنشى ورىندى يەلەنگەن بولاتىن. كاپيتان م. مۇحتاروۆ ۇلىن لايىقتى تاربيەلەگەنى ءۇشىن دۇيسەگۇل اقجىگىتوۆاعا شىنايى ريزاشىلىعىن ءبىلدىردى.
ءبىرىڭعاي اشىق ەسىك كۇنى اتا-انالارعا ۇلدارىنىڭ كاسىبي كومانديرلەردىڭ باسشىلىعىمەن قىزمەت اتقارىپ، جان-جاقتى قولداۋعا يە بولىپ وتىرعانىنا كوز جەتكىزۋگە مۇمكىندىك بەردى. بۇل شارا ارميا تۋرالى قالىپتاسقان ستەرەوتيپتەردى ەڭسەرۋگە، سونداي-اق ساربازدارعا دەگەن قامقورلىقتىڭ قارۋلى كۇشتەر ءۇشىن ءسوزسىز باسىمدىق ەكەنىن نىعايتا تۇسۋگە باعىتتالعان ماڭىزدى قادام بولدى.