الماتى قالاسى ءماسليحاتىنىڭ سەسسياسىندا كادرلىق ماسەلە قارالدى. پرەزيدەنت اكىمشىلىگىنىڭ كەلىسىمىمەن الماتى اكىمى تۇركسىب اۋدانىنىڭ اكىمى قىزمەتىنە دامير اكەجانوۆتىڭ كانديداتۋراسىن ۇسىندى. بۇعان دەيىن ول الماتى قالاسى اكىمى اپپاراتى باسشىسىنىڭ ورىنباسارى لاۋازىمىن اتقارعان.
كانديداتتى تانىستىرعان دارحان ساتىبالدى ونىڭ كاسىبي تاجىريبەسىنە جانە قالانىڭ تىنىس-تىرشىلىگىن جاقسى بىلەتىنىنە توقتالدى.
«دامير اكەجانوۆتىڭ مەملەكەتتىك باسقارۋ جۇيەسىندە تاجىريبەسى مول، قالانىڭ وزەكتى تۇيتكىلدەرىن جاقسى بىلەدى جانە مەن جۇكتەگەن مىندەتتەردى ورىنداۋعا قاجەتتى كاسىبي دايارلىعى بار»، – دەدى قالا باسشىسى.
تالقىلاۋ قورىتىندىسى بويىنشا ءماسليحات دەپۋتاتتارى ۇسىنىلعان كانديداتۋرانى قولدادى.
دامير اكەجانوۆ 2002 جىلى ءال-فارابي اتىنداعى قازاق ۇلتتىق ۋنيۆەرسيتەتىن «حالىقارالىق قۇقىق» ماماندىعى، ال 2008 جىلى «قارجى» ماماندىعى بويىنشا ءتامامداعان.
ەڭبەك جولىن 2002 جىلى سىرتقى ەكونوميكالىق بايلانىستار سالاسىندا باستاعان. ءار جىلدارى الماتى قالاسى اكىمدىگىنىڭ قۇرىلىمدارىندا، سونىڭ ىشىندە كاسىپكەرلىك، ونەركاسىپ جانە ينۆەستيسيا ماسەلەسىنە جەتەكشىلىك ەتەتىن دەپارتامەنتتەر مەن باسقارمالاردا، سونداي-اق اۋدان اكىمدەرىنىڭ اپپاراتتارىندا جۇمىس ىستەگەن. باسشىلىق قىزمەتتەر اتقارىپ، جەتىسۋ اۋدانى اكىمىنىڭ ورىنباسارى بولعان.
جاڭا قىزمەتكە تاعايىندالعانعا دەيىن الماتى قالاسى اكىمى اپپاراتى باسشىسىنىڭ ورىنباسارى لاۋازىمىن اتقارعان.
مەملەكەتتىك قىزمەتتەگى جالپى ەڭبەك ءوتىلى 16 جىلدان اسادى.