تاۋلى قاراباق ايماعىنداعى قاقتىعىستىڭ شيەلەنىسۋىنەن كەيىنگى العاشقى كەزدەسۋ
مەملەكەتتىك حاتشى ارمەنيا مەن ءازىربايجان سىرتقى ىستەر مينيسترلەرىمەن ءۇشجاقتى كەزدەسۋ وتكىزدى، دەپ حابارلايدى Almaty-akshamy.kz Tengrinews.kz-كە سىلتەمە جاساپ.
اقش مەملەكەتتىك دەپارتامەنتى سايتىندا جاريالانعان مالىمەتتە اقش مەملەكەتتىك حاتشىسى ەنتوني بلينكەننىڭ ارمەنيا جانە ءازىربايجان سىرتقى ىستەر مينيسترلەرى ارارات ميرزويان جانە دجەيحۋن بايراموۆپەن كەزدەسۋى تاۋلى قاراباق ايماعىنداعى قاقتىعىستىڭ شيەلەنىسۋىنەن كەيىنگى العاشقى كەزدەسۋ بولعانى ايتىلعان.
اقش سىرتقى ساياسي ۆەدومستۆوسى مالىمدەمەسىندە ميرزويان جانە بايراموۆپەن كەزدەسۋ كەزىندە بلينكەن قاقتىعىس كەزىندە ادامداردىڭ قازا بولۋىنا بايلانىستى كوڭىل ايتقانى جانە ودان ءارى سوعىس قيمىلدارىنىڭ الدىن الۋ قاجەت ەكەنىن ايتقانى كورسەتىلگەن.
"پرەمەر-مينيستر پاشينيانمەن جانە پرەزيدەنت الييەۆپەن سوڭعى رەت سويلەسكەنىمدە، ەكى باسشى دا ماعان بەيبىتشىلىككە دايىن ەكەنىن ايتتى. ارمەنيا مەن ءازىربايجان اراسىنداعى كەلىسپەۋشىلىكتەردىڭ اسكەري شەشىمى جوق. ءبىراق، مەنىڭ ويىمشا، كەلىسپەۋشىلىكتەردى ديپلوماتيا ارقىلى شەشەتىن تۇراقتى بەيبىتشىلىككە اپاراتىن جول بار. قۇراما شتاتتار بۇل كۇش-جىگەردى قولداۋ ءۇشىن قولدان كەلگەننىڭ ءبارىن جاساۋعا دايىن"، - دەدى بلينكەن.
ەسكە سالايىق، ارمەنيا مەن ءازىربايجان اراسىنداعى قاقتىعىس 13 قىركۇيەككە قاراعان ءتۇنى تاعى دا ۋشىعا ءتۇستى. ارمەنيا قورعانىس مينيسترلىگى مالىمەتىنشە، ءازىربايجان شەكاراداعى ەلدى مەكەندەر باعىتىندا وق جاۋدىرعان. باكۋ بولسا، ەريەۆاندى شەكارادا اۋقىمدى ارانداتۋشىلىق جاسادى دەپ ايىپتادى.