دەپۋتاتتىڭ وكىلەتتىگى ونىڭ جەكە ءوتىنىشى نەگىزىندە توقتاتىلعان.
الماتى ءماسليحاتىنىڭ سەسسياسىندا دەپۋتات ارمانجان بايتاسوۆتىڭ وكىلەتتىگى توقتاتىلدى، دەپ حابارلايدى Almaty-akshamy.kz.
الماتى قالاسىنىڭ ءماسليحاتى مالىمدەگەندەي، دەپۋتاتتىڭ وكىلەتتىگى ونىڭ جەكە ءوتىنىشى نەگىزىندە توقتاتىلعان. بۇل شەشىمدى ارمانجان مەرەكە ۇلى ەلىمىزدىڭ جانە شەكارالاس مەملەكەتتەردىڭ اۋماعىندا جۇزەگە اسىرىلاتىن اۋقىمدى مەدياجوبانى ىسكە اسىرۋمەن ءتۇسىندىردى. ارمانجان بايتاسوۆ «Nur Otan» پارتياسىنىڭ مانداتى بويىنشا سايلانعاندىقتان، پارتيانىڭ قالالىق فيليالى بيۋروسىنىڭ شەشىمىمەن بەلگىلى قۇرىلىسشى، قازاقستان قۇرىلىس سالاسى وداعىنىڭ باسقارما ءتوراعاسى ەرالى ساۋرانبايەۆ ارمانجان بايتاسوۆتىڭ ورنىنا ءماسليحات دەپۋتاتى بولىپ سايلاندى. ءماسليحاتتىڭ كاسىپكەرلىكتى، يننوۆاسيالاردى، اقپاراتتىق تەحنولوگيالاردى جانە كرەاتيۆتى يندۋستريانى دامىتۋ جونىندەگى تۇراقتى كوميسسياسىنىڭ ءتوراعاسى بولىپ دەپۋتات قايرات قۇدايبەرگەن سايلاندى.