كونستيتۋسيانى تۇزەتۋ ءماتىنى بارلىق قازاقستاندىقتارعا جەتكىزىلۋى كەرەك. بۇل رەتتە رەسپۋبليكالىق رەفەرەندۋمدا داۋىس بەرۋگە ارنالعان بيۋللەتەندە قىسقا جاۋاپتار كوزدەلەدى. بۇل تۋرالى ءماجىلىس دەپۋتاتى ارمان قوجاحمەتوۆ ايتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«پرەزيدەنت جارلىعى كونستيتۋسياعا ەنگىزىلەتىن تۇزەتۋلەردىڭ نىسانى مەن ءماتىنىن ۇسىنادى. ازاماتتار ءوز شەشىمدەرىن شىعارادى. ولار «ءيا» نەمەسە «جوق» دەپ داۋىس بەرە الادى. بيۋللەتەن فورماسىندا «ءيا» نەمەسە «جوق» دەگەن قىسقا جاۋاپتار عانا بولادى. تۇزەتۋلەر ءماتىنى ەلىمىزدىڭ بارلىق ازاماتتارىنا جەتكىزىلۋى ءتيىس. ءبىز ولارمەن تانىسىپ، سودان كەيىن رەفەرەندۋمدا ءتيىستى شەشىم قابىلداۋىمىز كەرەك»، - دەپ ءتۇسىندىردى دەپۋتات ءماجىلىس وتىرىسىنان كەيىن تىلشىلەرگە.
ءماجىلىس دەپۋتاتىنىڭ ايتۋىنشا، حالىق رەفەرەندۋمعا ۇلكەن قىزىعۋشىلىق تانىتادى.
«رەفەرەندۋمنىڭ شەشىمى زاڭدى، ويتكەنى ول ءتيىستى زاڭدا سولاي جازىلعان. ءبىز الەۋمەتتىك جەلىلەردە كورىپ وتىرعان ۇسىنىستار مەن بەلسەندىلىككە قاراساق، كونستيتۋسياعا تۇزەتۋلەر ەنگىزۋ ماسەلەسى قوعامىمىزدىڭ كوپتەگەن ازاماتتارىن تولعاندىرادى. سوندىقتان، قىزىعۋشىلىق ۇلكەن بولادى دەپ ويلايمىن»، - دەدى ا.قوجاحمەتوۆ.
دەپۋتات بۇل تۇزەتۋلەردە ەلباسى مارتەبەسى تۋرالى جانە تۇڭعىش پرەزيدەنتتىڭ تاۋەلسىز قازاقستان مەملەكەتىنىڭ نەگىزىن قالاۋشى ەكەندىگى تۋرالى سوزدەر الىنىپ تاستالاتىنىن ەسكە سالدى.
سونىمەن بىرگە، تىلشىلەر «تۇڭعىش پرەزيدەنت – ەلباسى تۋرالى» زاڭنىڭ كۇشىن جويۋى مۇمكىن بە دەگەن سۇراق قويدى.
«ءيا دەپ ويلايمىز، قۇجاتتار پاكەتىندە قاراستىرىلعان. ءبىراق شەشىمدى تۇرعىندار رەفەرەندۋمدا قابىلدايدى. ەگەر بۇل ءۇشىن قوعام داۋىس بەرسە، تيىسىنشە، مۇنداي شەشىم ودان ءارى قابىلداناتىن بولادى»، - دەدى ارمان قوجاحمەتوۆ.
ونىڭ ايتۋىنشا، پرەزيدەنتتىڭ كونستيتۋسياعا ۇسىنىستار دايىنداۋ جونىندەگى جۇمىس توبىن قۇرۋ تاپسىرماسىنان كەيىن ءماجىلىستىڭ زاڭناما جانە سوت-قۇقىقتىق رەفورما كوميتەتى رەفەرەندۋم ماسەلەلەرىن رەتتەيتىن قولدانىستاعى زاڭنامانى قولعا الدى.
«رەسپۋبليكالىق رەفەرەندۋم تۋرالى زاڭنىڭ 28-بابى بويىنشا جۇمىستى باستادىق. ءبىز بيۋللەتەننىڭ فورماسىن سۇرادىق جانە كەيىن داۋىس ساناۋ كەزىندە قيىندىقتار تۋىنداۋى مۇمكىن ەكەنىن كوردىك. سوندىقتان وسىنداي تۇزەتۋ بولدى، ياعني بۇل ءبىزدىڭ دەپۋتاتتارىمىزدىڭ، ءبىزدىڭ كوميتەتتىڭ باستاماشىل زاڭ جوباسى. ولار ءتيىستى تۇزەتۋلەر جاساپ، پارلامەنت ماجىلىسىنە ۇسىندى»، - دەدى دەپۋتات.