بالالاردى قورعاۋ كۇنىنە وراي قازاق مەملەكەتتىك سيركىندە مۇمكىندىگى شەكتەۋلى بالالارعا ارنالعان اتپەن سەرۋەندەۋ قايىرىمدىلىق اكسياسى ءوتتى.
«مۇنداي ءىس-شارانى جىل سايىن وتكىزىپ وتىرۋ داستۇرگە اينالعان. پاندەمياعا دەيىن 4000-6000 بالانى قامتيتىن تەگىن ءىس-شارالار ۇيىمداستىرىپ كەلدىك. كارانتيندىك شەكتەۋلەر جۇمىسىمىزعا كەدەرگى كەلتىرگەنى راس. ءبىراق بالانىڭ قۋانىشىن شەكتەۋگە بولمايدى. كارانتيندىك شارتتاردى ساقتاي وتىرىپ، 40-قا جۋىق بالانى قۋانتۋدى ۇيعاردىق»، – دەدى مەكەمە باسشىسى باقىت بوكەبايەۆ.
قازاقستاندا يپپوتەراپيا سەكىلدى ساۋىقتىرۋ ءادىسى ءالى دە بولسا كەڭىنەن تارالا قويماعان. مامانداردىڭ ايتۋىنشا، يپپوتەراپيا سال اۋرۋىمەن اۋىراتىن بالالاردىڭ دەنساۋلىعىن جاقسارتۋعا ىقپال ەتەدى، سەبەبى اتقا ءمىنىپ، باياۋ ءجۇرۋ دەنەنى باسقارۋعا ۇيرەنۋگە، قيمىل-قوزعالىس جانە سويلەۋ بەلسەندىلىگىن ارتتىرۋعا مۇمكىندىك بەرەدى. وسى جاڭاشا ءادىستى مەرەكەلىك ويىن-ساۋىققا اينالدىرعانىنا قۋانعان اتا-انالار العىس ءبىلدىردى.
«مەن مۇمكىندىگى شەكتەۋلى 8 جاسار بالانىڭ اناسىمىن. بالامنىڭ جىلقىعا وتىرىپ قۋانعانىن كورىپ، مەنىڭ دە كوڭىلىم كوتەرىلىپ قالدى»، – دەيدى لاۋرا اسقار قىزى.
سونىمەن قاتار، قازاق مەملەكەتتىك سيركىنىڭ ارتىستەرى حالىقارالىق بالالاردى قورعاۋ كۇنىنە وراي بوستاندىق، المالى، مەدەۋ اۋداندارىندا وتكىزىلگەن مەرەكەلىك ءىس-شارالارعا قاتىستى.