ونىڭ بويىندا بۇعان دەيىنگى دينوزاۆرلاردا بولماعان ەرەكشەلىكتەر بار
ارگەنتينالىق ارحەولوگتار الىپ پتەروزاۆردىڭ قاڭقاسىن تاپتى. الدىن الا ەسەپ بويىنشا، وعان شامامەن 86 ملن جىل بولعان، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
ەجەلگى سۇيەكتىڭ ۇزىندىعى 9 مەترگە جەتەدى. قازبا جۇمىستارى ەلدىڭ باتىسىنداعى مەندوسا پروۆينسياسىندا جۇرگىزىلگەن. پەتروزاۆرلار قۇستاردان بۇرىن جارالعان العاشقى ومىرتقالىلار بولىپ سانالادى. ولار اجەپتاۋىر ۇشا بىلگەن. پەتروزاۆردىڭ جاڭا ءتۇرى تۋرالى بۇل زەرتتەۋ Cretaceous Research عىلىمي جۋرنالىندا جارىق كورگەن.
«پەتروزاۆردىڭ جاڭا ءتۇرىن تاۋىپ، ۇلكەن جاڭالىقتار اشقالى تۇرمىز. ونىڭ بويىندا بۇعان دەيىنگى دينوزاۆرلاردا بولماعان ەرەكشەلىكتەر بار. ءبىز «ساناتوسدراكون» دەگەن اتاۋعا توقتالدىق. «ساناتوس» – ءولىم، «دراكون» – ايداھار دەگەن ۇعىمدى بەرەدى. بۇل ۇشۋعا قابىلەتتى الىپ جىرتقىش ءولىم ايداھارى دەپ اتالادى»،-دەيدى عىلىمي جەتەكشى لەوناردو ورتيس ديەۆيد.